آواران: چہ جاھو ءَ زورگریں پاکستانی پوج ءَ درمان نامیں ورنایے آوار جتگ ءُ بیگواہ کرتگ۔
زرمبش جھگیر ءِ رد ءَ بیگواھیں درمان ء رھیم بکش جاھو ءِ میتگ چھبی ءِ جاہ منند اِنت۔ دو روچ پیش پاکستانی پوج ءَ گوں دگہ باز مردماں وتی بنجل ءَ لوٹائینتگ ءُ آدگہ مردم یل داتگ اَنت درمان داشتگ، گڑا چہ کھول ءِ مانزمانی ءَ آ روچ ءَ یل کنگ بوتگ۔
ھندی بنشون ءِ رد ءَ ھما روچ ءَ کہ پوج ءَ یل داتگ گڑا ایشی کھول ءَ ھمے گوشگ بوتگ ھمک روچ سھب ءَ پہ پیشی ءَ بنجل ءَ آرگ بہ بیت۔ مرچی آئی کھول ءَ پہ پیشی ءَ بنجل ءَ برتگ ءُ پوج ءِ یل کنگ ءَ پد بیگاہ ءَ وتی گسانی نیمگ ءَ آھگ بوتگ اَنت کہ بنجل ءِ نزیک ءَ چیریں ادارھانی کارمنداں آوار جتگ ءُ گوں وت برتگ۔
چہ چیریں ادارھانی آوار جنگ ءَ پد آئی کھول سکا ترس آماچ اِنت۔
