چہ نوشکے ءَ پاکستانی لشکر ءِ دست ءَ زوربیگواہ کنگ بیتگیں الاوالدین کشانی ء ابدُلجلیل کشانی ءِ زوریں بیگواھی ءَ شش سال سرجم بوتگ ءُ چہ انسانی ھکانی ادارھانی پہ آئی آجوئی ءَ توار چست کنگ ءِ لوٹ کرتگ۔
الاوالدین کشانی ءِ کھول ءَ گوشتگ کہ الاوالدین دالبندین کلی کاسم ھان ءِ جھمننند اِنت ءُ شال ڈگری کالج ءِ نودربرے ۔ زورگریں پاکستانی لشکر ءُ چیریں ادارھانی کارمنداں 25 مئی 2019 ءَ چہ نوشکے بٹو ءَ آوار جتگ ءُ بیگواہ کرتگ کہ انگت آئی ھچ ھال نیست۔
آئی کھول ءَ گوشتگ کہ چہ الاوالدین ءِ زوریں بیگواھی ءَ مئے سرجمیں کھول سسائی نادراھیانی دیمپان اِنت۔ اے ششیں سال ءِ درد ءُ رنج کہ ما ءَ اوپار کرتگ ءُ آئی ودار ءَ نشتگ ایں اے گوں لبزاں درشان کنگ نہ بنت
آئی کھول ءَ گوشتگ کہ ما چہ درسیں سرکاری ادارھاں لوٹ کن ایں کہ الاوالدین ءِ سر ءَ چونیں بھتامے ھست آمیدگس ءَ پیش کنگ بہ بیت۔ اگاں آ بے میار اِنت گڑا زوت آجو کنگ بہ بیت۔
الاوالدین ءِ کھول ءَ چہ بلوچ راج، جھانی انسانی ھکانی ادارہ ءُ باسکاں پہ الاوالدین کشانی ءِ آجوئی ءَ توار چست کنگ ءِ لوٹ کرتگ ءُ گوشتگ کہ آ بے میار اِنت ءُ زوت آجو کنگ بہ بیت دانکہ آئی کھول چہ اے آزاراں بہ رکّیت۔
