اسلام آباد ءَ بلوچ یکجھتی کمیٹی ءِ برجاھیں زھرشانی نندانک ءِ سروک ڈاکٹر ماہ رنگ ءَ ماں رسانکدر ءَ لیاری ءَ زھرشانی روانک ءِ پولیس ءِ دارگ ءِ پژدر ءَ نبشتگ کہ لیاری چہ دھکاں ریاست ءِ زوراکیانی آماچ اِنت۔ پہ لیاری ءِ سیاسی بودناکی ءِ ھلاس کنگ ءَ لیاری ءِ ورنا توپک دست ءَ دیگ ءُ گینک وار ءِ نام دیگ بوتگ اَنت۔ وت ءَ ماں وت میڑینتگ ءُ سدانی کچ ءَ ورنا کشارینتگ ءُ لشکرکشی ءِ دروگ ساچ اِتگ ءُ سند رینجر ءَ گساں بیڑ برتگ ورنا زور بیگواہ کرتگ اَنت ءُ دروگیں میڑاں ورنا کشتگ اَنت، اے درچ انگت ءَ برجاہ اِنت۔
آئی ءَ گوشتگ کہ لیاری ءَ زوریں بیگواھی ءُ درکانودی کشتگیں ورنایانی کچ سدانی ھساب ءَ اِنت۔ پہ بلوچ ورنایانی تباہ کنگ ءَ ریاست ءِ پولیس ءِ سروکی ءَ دمک دمکانی تہ ءَ نشہ بھا بوگ ءَ اَنت۔
ڈاکٹر ماہ رنگ ءَ گوشتگ کہ درسیں زوراکی ءُ پندلانی مول ھمیش اِنت کہ سید زھور شاہ ھاشمی، لالا لال بکش رند، اکبر بارکزھی، یوسپ نسکندی ءُ استاد سبا دشتیاری ءِ سیاسی زانشت ھلاس بہ بیت۔
آئی ءَ گوشتگ کہ چہ اے درساں ابید لیاری ءِ سیاسی ءُ راجی زانشت نہ تیوک ءَ زندگ اِنت، بلکیں مئے اوست ءُ دلبڈی ءِ سوب اِنت۔
ڈاکٹر ماہ رنگ ءَ گوشتگ کہ اے زرمبشت چہ لیاری ءَ داں تونسہ ءَ مئے اوست، دلبڈی ءُ جزبگ ءَ توانمند ءُ ھاٹیگ بکشگ ءَ اِنت۔
