بلوچ یکجھتی کمیٹی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ که چار روچ اِنت که مستونگ ءِ ھند اسپلنجی ءَ گو برجاھیں ریاستی زوراکی ءَ انسانی ھکانی بگیری ءَ کنگ اِنت، ھندی بلوچ مھلوک انگر ءَ کنگ بیتگ اَنت ءُ بازیں کچے ءَ مردم زور بیگواه کنگ بیتگ اَنت. اِے جاورانی بگیری ءَ دمگ ءِ مردماں لشکر ءِ بنجل ءِ دیم ءَ زهرشانی ھم کرتگ، بلے دامگ ءُ رھوتی نزام ءِ بند بوگ ءِ سوب ءَ لس مردم سرجم ءَ ریاستی ادارھانی زوراکیانی دیم ءَ یل کنگ بیتگ اَنت.
آئی ءَ گوشتگ که اسپلنجی ءَ برجاھیں رستری بلوچستان ءَ برجاھیں ریاستی زوراکیانی درچ اِنت که ھمک روچ ءِ جتائیں ھنداں ایمنی ءِ نام ءَ کاروائی کنگ بوگ ءَ اِنت ، اِے کاروائیانی میان ءَ لس مردم کم شرپ کنگ ، زور بیگواه ءُ درکانودی کشگ بوگ ءَ اَنت، اِے زوراکی شونداتاں آیانی زند ءِ ایمنی پُل اِتگ ءُ آ ترس ءِ آماچ کرتگ اَنت ، چوش که یک سپاھیگے ءِ توپگ مردمانی مرگ ءُ زند ءِ پیسله ءَ کنگ اِنت.
بی وائی سی ءَ گوشتگ که بلوچستان ءَ گوستگیں چہ دو دھکاں برجاھیں لشکری لشکر کشیانی سوب ءَ ھزارانی کچ ءَ مردم چه وتی گساں لڈ ءُ بار کنگ ءَ لاچار بیتگ اَنت ، آواران ، کولواه ، ڈیره بگٹی ، کوھلو ، کاھان ، بولان ءُ مکران ءِ ھم بازیں دمگانی مردم لڈینگ ءُ میتگ ھالیگ کنگ بیتگ اَنت ، ایشی ءَ نه اِیوک ءَ دمگ سانمند کرتگ بلکیں ھزارانی کچ ءَ مردماں وتی دلوت، زمین ءُ کار ءُ مڈیانی یل کنگ ءُ په آدگه ھنداں باھوٹی بوگ ءَ لاچار بیتگ اَنت.
آئی ءَ گوشتگ که سرجمیں بلوچستان یک لشکری چاگردے جوڑ کنگ بیتگ که ایشی ءِ آسر ءَ لس مردمانی زند پریشانی ءُ زوراکیانی آماچ اِنت ، بلوچ یکجھتی کمیٹی ءَ چه بندات ءَ اِے زوراکیانی بگیری ءَ توار چست کرتگ ءُ ماں میان استمان ءَ ھم په اِے زوراکیانی پاشک کنگ ءَ جھد کرتگ، چه ریاستی ادارھانی نیمگ ءَ بی وائی سی ءِ بگیری ءَ زوراکی،پہ اِے جھد ءِ بے توار کنگ ءَ یک جھدے بوگ ءَ اِنت۔ بی وائی سی ءَ گوشتگ که رسانکدر ءُ رھوتی نزام ءِ نه بوگ لشکر ءَ دوریں ھند ءُ دمگاں بے ترس ءُ جنجال ءَ ناشرکاریانی موہ ءَ دنت که اِے انسانی ھکانی ءُ آجوئیں رھبندانی بگیری اِنت
