زیارت: چوتیر ءَ سی ٹی ڈی ءَ دروگیں میڑے ءَ ھپت سلاہ بندیں مردمانی کشگ ءِ ٹاپار جتگ۔
سی ٹی ڈی ءَ ماں رسانکدر ءَ وتی شنگ کرتگیں درشانے ءَ گوشتگ کہ زیارت ءِ ھند چوتیر ءَ سی ٹی ڈی ءُ آدگہ لشکری کارمنداں چیریں ھالے ءِ پد ءَ کاروائی کرتگ۔ ھمے میان ءَ سی ٹی ڈی ءُ سلاہ بندیں مردمانی میان ءَ میڑے بوتگ۔ میڑ ءَ ھپت سلاہ بندیں مردم کشتگ۔
آئی گوشتگ کہ میڑ ءَ جنگ بوتگیں مردم بی ایل اے ءِ باسک اَنت کہ چہ آیاں بازیں کچے ءَ سلاہ، گولا ءُ تراکناکیں شورہ دزکپتگ۔
سی ٹی ڈی ءَ گوشتگ کہ جنگ بوتگیں مردم جتاھیں کاروائیاں ھوار بوتگ اَنت۔
چوش کہ سی ٹی ڈی ءَ زی ھم سلاہ بندیں گل ءِ دو باسک ءِ کشگ ءِ ٹاپار جتگ اَت بلے آیانی پجار نہ گوشتگ اَت۔ ھمے وڑ ءَ مرچی پد ءَ سی ٹی ڈی ءَ دگہ ھپت مردم کشتگ ءُ آیاں بی ایل اے ءِ باسک پدّر کنگ ءَ اِنت۔
انچوش گمان کنگ بیت کہ اے ھپتیں مردم چہ پیسر ءَ زوربیگواہ کنگ بوتگیں مردم اَنت کہ سی ٹی ڈی ءَ کشگ ءَ پد آیاں سلاہ دست ءَ داتگ ءُ اکس شنگ کرتگ اَنت۔
