بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بی وائی سی ءِ سروک ڈاکٹر ماہ رنگ بلوچ، بیبرگ بلوچ، بیبو بلوچ ءُ شاہ جی بلوچ گوستگیں پنچ روچ اِنت کہ زندان ءَ شدکشیں ھرتال ءَ بیتگ اَنت۔ چہ شدکشیں ھرتال ءِ سوب ءَ آیانی جاور گوں ترندی ءَ ناگیگ بوان بیتگ اَنت، چہ یک ماھے ءَ گیش زندانی بوگ ءِ سوب ءَ آ پیسر ءَسانمند بیتگ اَنت۔ یکشل ءَ چہ شد ءُ گرم ءِسوب ءَ آیانی جاور گیشتر ناگیگ بیتگ۔
آئی ءَ گوشتگ کہ پہ شدکشیں ھرتال ءِ ھلاس کنگ ءَ بلوچ چاگرد ءِ جتائیں بھرگاں سیادی داروکیں مردم یکشل ءَ گوں بلوچ یکجھتی کمیٹی ءِ سروکاں رھوت کنگ ءُ گوں آیاں لوٹ کنگ ءَ بیتگ اَنت کہ آ وتی شدکشیں ھرتال ءَ ھلاس بہ کن اَنت۔ مرچی زور بیگواھیں مردمانی کھول، سیاسی بندیگانی کھول ءُ کلانھیں وکیلانی رمبے زاندان ءَ شتگءُ گوں بلوچ یکجھتی کمیٹی ءِ سروکاں لوٹ اِش کرتگ کہ اگاں ریاست ءَپہ شمئے جان ءَ پرواہ نیست بلے شمئے جان مارا دوست اِنت۔ مھربانی بہ کن اِت ءُ پہ مئے شرپ ءَ وتی شدکشیں ھرتال ءَ ھلاس بہ کن اِت۔
آئی ءَ گوشتگ کہ زاند ان ءِ انتزامیہ ءَ ڈاکٹر ماہ رنگ بلوچ، شاہ جی بلوچ ءُ بیبرگ بلوچ ءِ کھول ءُ وکیلان ءَ گندک کنگ ءِ موکل داتگ۔ چہ گندک ءَ پد بلوچ یکجھتی کمیٹی ءِ سروکاں زور بیگواھیں مردمانی کھول ءُ کلانھیں وکیلانی شرپ ءَ وتی شدکشین ھرتال ءِ ھلاسی ءِ سوڑگ کرتگ۔
