بلوچ یکجھتی کمیٹی ءِ سروک سمی دین بلوچ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ که بی وائی سی ءِ سروک ءَ ڈاکٹر ماه رنگ بلوچ ، شاه جی سبگت الله ، بیبگر ، گلزادی ءُ بیبو ءَ ھوار بازیں کارکن ھوار اَنت که انوں ایم پی او ءِ درکانودی ءُ بے راھبندی ءِ رد ءَ بندیگ اَنت۔ آیانی دزگیری ءَ بیست ءُ پنچ روچ ءَ گیش گوستگ، آیانی سر ءَ بس ھمے سوب ءَ بھتام جنگ بیتگ که آیاں بلوچستان ءَ ریاست ءِ برجاھیں زوراکیانی بگیری ءَ توار چست کرتگ ءُ آ گوں دلیری ءَ دنیا ءِ دیم ءَ پدر کرتگ اَنت.
آئی ءَ گوشتگ که ھما نزام که آئی ءِ ته ءَ ھک ءُ انساپ لوٹوک جیل ءَ بند کنگ بنت ھمے گپ ءِ تچکیں منانک اِنت که زوراکی کنوکیں نزام په وتی شر کنگ ءَ جاڑیگ نه اِنت. بلے انوں جاور مٹ بیتگ اَنت بلوچ ءِ ھمک زھگ ریاستی زوراکیاں سرپد اِنت ، گوں راست گوش ءُ انساپ لوٹانی بندیگ کنگ ءَ آیانی توار چتو بند کنگ بیت ؟ .
