بلوچ لبریشن آرمی ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں تربت ، جاپرآباد ءُ پنجگور ءَ سے جتائیں کاروائیاں زورگریں پاکستانی لشکر ءِ چریک، لشکر ءِ چیردستیں کارمند ءُ راشن بروکیں گاڑی نشانگ کرتگ اَنت۔
آئی ءَ گوشتگ کہ بی ایل اے ءِ سرمچاراں دوشی جاپرآباد ءِ ھند ڈیرہ اللہ یار ءَ میر ھسن ءَ پولیس ءِ چوکی گوں دستی بمب ءَ نشانگ کرتگ ۔ ایشی ءِ آسر ءَ سے کارمند ٹپی بوتگ۔
جارکش ءَ گوشتگ کہ دگہ یک کاروائی یے ءَ بی ایل اے ءِ سرمچاراں پنجگور ءِ ھند پروم ءَ پہ پاکستانی لشکر ءَ راشن بروکیں گاڑی یے نشانگ کرتگ ۔ سرمچاراں ٹرک گاڑی ءِ ٹائر تیرگواری کرتگ ءُ جتگ اَنت ھمے وڑ ءَ ڈرائیور کڈن ءَ پد یل کرتگ اَنت۔
آئی ءَ گوشتگ کہ بی ایل اے ءُ سرمچاراں پنچ شمبے ءِ شپ ءَ تربت ءِ ھند کلاتک ءَ پزل ء ابراھیم جاہ منند گیبن اُرشے ءَ کشتگ۔ پزل زورگریں پاکستانی لشکر ءِ جوڑ کرتگیں کشندہ ٹولی ءِ کارمندے بیتگ کہ راشد پٹان ءِ سروکی ءَ کار ءَ بیتگ۔
جارکش ءَ گوشتگ کہ پزل چہ 2011 ءَ پہ پاکستانی لشکر ءَ چریک ءُ چاریگی ءَ بیتگ۔ آئی ءَ 2011 ءَ کیچ ءِ ھند ناسرآباد ءَ دُزی ءِ میان ءَ مساپر گاڑیانی سر ءَ تیرگواری کرتگ ءُ بازیں جنین ءُ زھگ کشتگ۔ چہ ایشی ءَ ابید گیبن ءَ لشکری زوراکیاں تچک ءَ ھوار بیتگ ءُ 12 بلوچ ئِے کشتگ۔
آئی ءَ گوشتگ کہ چریک پزل ءَ 2013 ءَ کیچ ءِ ھند کلاتک ءَ یک بے میاریں مستری یے زور بیگواہ کرتگ ءُ زورگریں لشکر ءِ دست ءَ داتگ کہ شش ماہ ءَ پد آئی ژانگولیں لاش دزکپتگ۔ ھمے وڑ ءَ 2012 ءَ آئی ءَ تیرگواری کرتگ ءُ کلاتگ ءَ سمیر نامیں ورنایے کشتگ۔ چہ ایشی ءَ ابید 2015 ءَ کیچ ، شے کھن ءَ دگ بستگ ءُ گل ءِ سنگت ھالک بلوچ شھید کرتگ ءُ 2016 ءَ گیبن ءَ مسیت ءِ ڈن ءَ تیرگواری کرتگ ءُ بے میاریں ورنایے کشتگ۔
جارکش ءَ گوشتگ کہ چریک پزل ءِ میار باز اَنت ، آئی ءَ زورگریں لشکر ءِ ھمرائی ءَ گسانی سر ءَ بیڑ برگ ءِ میان ءَ چادر ءُ چاردیوالیانی پادمال کنگ، زوریں بیگواھی ءُ نشانگی کوشاں ھوار بیتگ۔ راجی میارباری ءِ سوب ءَ بلوچ راجی آمیدگس ءَ پزل ءِ مرگ ءِ سزا داتگ کہ سرمچاراں ایشی سر ءَ کار کرتگ ءُ آ وتی گڈی آسر ءَ سر کرتگ۔
