بلوچ آجوئی لوٹوکیں رھشون ءُ بلوچستان لبریشن پرنٹ ءِ سروک ڈاکٹر اللہ نزر بلوچ ءَ وتی شنگ کرتگیں درشانے ءَ بلوچستان ءَ میان استمانی باپار کڈن کرتگ اَنت ءُ گوشتگ کہ پاکستان یک زوگریں ریاستےآ بلوچستان ءَ ناھکیں انسانی ھکانی بگیریاں ھوار اِنت۔ اے جاورانی تہ ءَ چونیں ھم باپارے بلوچستان ءَ نہ تیوک ءَ پھریز نہ اِنت بلکیں دودمانی ءُ کانود ءِ رد ءَ منگ نہ بیت۔
آئی ءَ گوشتگ کہ بلوچ راج ریاست ءِزورگپتی ءُ زوراکیانی بگیری ءَ وتی آجوئی ءِ جھد ءَ گوں مھکمیءَ کنگ ءَ اِنت ءُ چونیں ھم دری باپارے ءَ اے جھد ءِ بگیری ءَ مھکمیں گامگیجے سرپد بیت۔ بلوچ سرڈگار ءِ سر ءَ چونیں ھم باپاری بلوچ ءِ منشا ءَ ابید مھکم ءُ پھریز نہ بیت۔
بلوچ رھشون ءَ گوشتگ کہ بلوچستان یک زورگپتیں دمگے، اود ءَ بلوچ راج پہ وتی آجوئی ءُ وتواکی ءَ شریں وڑے ءَ جھد کنگ ءَ اِنت۔ اے جنگ بلوچستان ءَ دیر اِنت کہ برجاہ اِنت ءُ اے روچ پہ روچ ءَ ترند بوگ ءَ اِنت۔
آئی ءَ گوشتگ کہ زورگریں پنجاپی لشکر ءُ پاکستانءِ چیریں ادارھانی نیمگ ءَ لس بلوچانی بگیری ءَ کشگ ءُ چگل دیگ ءِ شوندات ءِ پارست ءَ یکشل ءَ زوراکی کنگ بوگ ءَ اِنت۔ژانگولیں لاشانی چگل دیگ ءُ زوریں بیگواھی ھمک روچی دودے جوڑ بیتگ، چہ ایشی ءَ بلوچستان ءِ ھمک گس سانمند اِنت۔
ڈاکٹر اللہ نزر بلوچ ءَ گوشتگ کہ بلوچستان ءَ رسانکدر بند اِنت ھمے سوب ءَ جھان نہ تیوک ءَ اد ءَ راستیاں سرپد بیت بلکیں چہ انسانی ھکانی ناھکیں بگیریانی دلگوش دیگ ءَ زبھر اِنت۔ بلوچ راج جھان ءَ را ھمے کلوہ ءَ دیگ لوٹ ایت کہ آ یک زندگ ءُ باسمائیں راجے کہ پہ وتی سرڈگار، پجار ءُ آجوئی ءَ دیمونی دیگ ءَ اِنت۔
بلوچ رھشون ءَ گوشتگ کہ یک ماھے ءَ تیوک ءَ چہ مشکے، بارکان، بلیدہ ءُ نوشکے ءَ دو درزن ءَ گیش بلوچ ورنا شھید کنگ بیتگ اَنت۔ دگہ سدانی کچ ءَ مردم انگت بیگواہ اَنت۔ چہ ایشی ءَ گمان کرت کن اِت کہ چہ بلوچستانءَ ھمک روچ ءِ بنیاد ءَ چنچو زور بیگواہ ءُ چنچو درکانودی کشگ بوگ ءَ اِنت، ءُ اے درچ چہ چنچو دھکاں برجاہ اِنت۔
آئی ءَ گوشتگ کہ بلوچستان اے وھد ءَ یک جنگ آماچیں دمگے، اود ءَ انسانی ھکانی ناھکیں بگیری ھمک روچی کارے بیتگ۔ اے وڑیں چاگردے ءَ میان استمانی باپارانی بلوچستان ءَ مادن ءُ زر ءِ یک زورگریں ریاستے ءِ سروکی ءَ گیش کنگ ءُ باپاری کنگ وتی باپاری ءِ زوال کنگ اِنت۔ اے سرڈگار ءُ ایشی مڈیانی واھند بلوچ راج اِنت۔
ڈاکٹر اللہ نزر ءَ گوشتگ کہ بلوچ راج میان استمانی تک ءُ باپاران ءَ ھمے کلوہ ءَ دنت کہ آیان ءَ چہ چین ءَ دربرگی اِنت۔ اود ءَ ھندی مردمانی منشا ءَ ابید باپاریانی بگیری ءَ لس مردم سکا گھگیری کن اَنت۔ پاکستان ءِ سروگان، سرکار ءُ لشکر نہ آیاں پھریز ات کن اَنت ءُ نہ لس بلوچانی منشا ءَ ابید چونیں ھم شوربندی یے سوبمند بوت کنت۔ بیرک کوپراینڈ گولڈ کمپنی ریکوڈک ءَ باپاری کنگ ءَ اِنت اود ءَ بلکیں کمپنی ءُ آئی شریدار بلوچستان ءِ سیاسی جاور، بلوچ راج ءِ آجوئی جھد ءُ پاکستان ءِ یک وتساچیں ریاستے ءِ بستار ءَ سرپد نہ اَنت۔
بلوچ رھشون ءَ گوشتگ کہ پمشکا سرجمیں جھان ءِ باپار، ادارہ ءُ ریاستاں کڈن کن ایں کہ آ بلوچستان ءَ وتی زراں زوال مکن اَنت۔ بلوچ راج ھمک روچ وتی جان ءِ دیمونی ءَ دیگ ءُ وتی سرڈگار، مڈی ءُ زراں پھریزگ ءَ اِنت۔ اے دیمونی یک کلوھے اَنت کہ بلوچستان ءَ باپاری بلوچ ءِ منشا ءَ ابید بوت نہ کنت۔
