بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ 5 اگست 2024 ءَ دژمن ءِ کمکاراں سرمچار سابر بلوچ پنام شھمین ءَ شھید کرتگ۔ چہ لھتیں سوبانی بنیاد ءَ گل ءَ آئی شھیدی ءِ ھال داشتگ۔
آئی ءَ گوشتگ کہ شھید سابر بلوچ ء دادشاہ گورستانی تیرتیج آواران ءِ جاہ منند اِنت۔ آئی 2014 ءَ پہ راجی آجوئی ءِ جھد ءَ بی ایل ایپ ءِ راھبند گچین کرتگ۔ جھد ءِ میان ءَ پاکستانی لشکر ءَ آئی کھول زوراکیانی نشانگ کرتگ، بلے آ چہ وتی کھول ءِ درسیں ریاستی زوراکی ءُجنجالاں ابید گوں آجوئی زرمبشت ءَ بندوک بیتگ۔
جارکش ءَ گوشتگ کہ 2016 ءَ شھید ءِ برات مھمد ازیم ءَ پاکستانی لشکر ءَ زور بیگواہ کرتگ ءُ رند ءَ ھب ءَ آئی لاش چگل داتگ۔
آئی ءَ گوشتگ کہ 2023 ءَ پاکستانی لشکر ءَ آواران ءِ کوھی ھنداں لشکرکشی کرتگ، ھمے میان ءَ لشکر ءَ آپ ءِ چمگانی تہ ءَ زھر مان کرتگ، ھمے زھریگیں آپانی ورگ ءَ شھید ءِ پت دادشاہ کہ آ یک شپانکے اَت شھید بیتگ۔
جارکش ءَ گوشتگ کہ چہ اےدرسیں زوراکیاں ابید شھید سابر بلوچ ءِ کھول پہ بلوچ راجی آجوئی زرمبشت ءِ سوبین کنگ ءَ مرچی ھم پرکار اِنت۔ آیانی گوں زرمبشت ءَ وپاداری ءُ ھمگرنچی ءَ کمی نہ یتکگ۔
میجر گھرام بلوچ ءَ گوشتگ کہ بی ایل ایپ شھید سابر بلوچ ءُ آئی کھول ءِ گرانبھائیں دیمونیاں ستک شانی ندر کنت ءُ ھمے کول ءَ کنت کہ پہ سرڈگار ءَ جانانی دیمونی دیوکیں بامردانی کاروان ھرپیم ءَ داں گڈی منزل ءَ سر کنگ بیت۔
