کلات: زورگریں پاکستانی لشکر ءِ دست ءَ زوربیگواہ کرتگیں ابدُلمالک ءِ لاش چہ باگبانہ ءَ دزکپتگ۔
بلوچ یکجھتی کمیٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ کلات ءِ ھند کوھنگ ءِ جھمنندیں ابدُلمالک ء مھمد یوسپ زورگریں پاکستانی لشکر ءَ پاری 11 اکتوبر ءَ آوار جتگ ءُ بیگواہ کرتگ۔ دوشی آئی تیرسپتگیں لاش چہ باگبانہ ءَ دزکپتگ۔
آئی گوشتگ کہ پاکستانی لشکر ءَ ابدُلمالک شھید کرتگ ءُ پد ءَ دروگیں ٹاپار جتگ ءُ گوشتگ کہ گوں پاکستانی لشکر ءِ کارمنداں میڑ ءَ جنگ بوتگ۔
کشگ بوتگیں ابدُلمالک ءِ کھول ءَ پاکستانی لشکر ءِ ٹاپار رد کرتگ ءُ گوشتگ کہ ابدُلمالک پاکستانی لشکر ءَ زوربیگواہ کرتگ ءُ آ دروگیں میڑ ءَ کشتگ۔ ابدُلمالک ءِ لاش کھول ءَ آئی بنکی ھنکیں کلات ءَ کل کرتگ۔
چوش کہ ابدُلمالک ءِ کھول ءَ آئی زوربیگواھی ءِ بگیری ءَ باز بر ءَ زھرشانی ءَ شھدگ بند کرتگ ءُ چہ سرکار ءَ آئی آجوئی ءِ لوٹ کرتگ اَت۔
