بلوچ نیشنل موومنٹ ( بی این ایم ) ءِ جارکش ءَ وتی شنگ کرتگیں درشانے ءَ گوشتگ کہ پاکستانی لشکر وتی شوربندی ءِ تیز کنگ ءَ پد زوت بلوچستان ءَ انسانی ھکانی کارکن ءُ لس شھریانی بگیری ءَ زورچکاسگ بندات کرتگ۔ انوگیں روچاں پاکستانی لشکر ءَ وتی ناھکیں تکشام تیز کرتگ ءُ سیاسی سروک، انسانی ھکانی پانکجن، ڈاکٹر ءُ سائنسدان ءَ آوار جنگ ءُ بیگواہ کنگ ءَ اِنت دانکہ بلوچ راج ءَ چہ لیکھی سروکاں زبھر بہ کنت۔
آئی ءَ گوشتگ کہ مرچی یک رندے پد ءَ ایمنیں زھرشانی کنوکانی سر ءَ پاکستانی لشکر ءَ تیرگواری کرتگ ، لشکر ءُ پولیس ءَ تچک ءَ ارش کرتگ ءُ سے زھرشانی کنوک شھید کرتگ ءُ دگہ ھپت ٹپی بیتگ۔ اے وتگڑیں شوربندی ” ہارڈ پالیس” نوکیں کارے نہ اِنت بلکیں چہ ھپتاد ءُ ھپت سالاں لشکر ءِ یکشلیں رویشت اِنت۔ زوریں بیگواھی چہ 1948 ءَ برجاہ اِنت ءُ چہ 27 مارچ 1948 ءَ کشت ءُ کوش ءُ لشکر ءِ ارش یکشل ءَ بوگ ءَ اَنت۔ پاکستانی لشکر ءِ داں مرچی پہ بلوچاں شوندات نرم نہ بیتگ۔ بلے چہ چنچو دھکاں یکشلیں زوراکیاں ابید رستری ھیلہ بلوچ راج ءِ توکل ءِ پروشگ ءَ بے سوب بیتگ۔
آئی ءَ گوشتگ کہ ما اے زوراکیاں گوں ترندیں دانکاں ایر جن ایں ءُ ھمے لوٹ ءَ کن ایں کہ میان استمانی تک زوت گامگیج بہ زور ایت ءُ اے رستری زوراکی ءَ بہ دار ایت۔
