بلوچ لبریشن آرمی ( بی ایل اے ) ءِ جارکش جئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں گوستگیں بیست چار ادار بیت کہ جاپر ایکسپریس ءُ اود ءَ ساڑی ئیں بندیگیں مردم داشتگ اَنت۔ دژمن ءِ دو سد ءَ گیش لشکری، انٹیلیجنس، پولیس ءُ نیم لشکری بی ایل اے ءِ بندیگ اَنت۔ اے ناشرکار اَنت کہ بلوچ سرڈگار ءِ سر ءَ ریاستی ناشرکاری، زوریں بیگواھی، درکانودی کوش ءُ راجی مڈیانی لٹ ءُ پل ءَ تچک ءَ ھوار بیتگ اَنت۔
جارکش ءَ گوشتگ کہ بی ایل اے ءَ میان استمانی جنگی کانود ءُ انسانی ھک چارتگ اَنت ءُپاکستان ریاست ءَ پہ وتی بندیگانی یل کناھینگ ءُ پہ آئی بندیاگانی یل کنگ ءَ 48 ادار ءِ موہ داتگ اَت۔ انگت ءَ زورگریں ریاست چہ بے سمائی، نادزرسی ءُ یکشلیں وھد زوالی ھمے پیش دارگ ءَ اِنت کہ پاکستان پہ وتی لشکری کارمندانی زندگیانی پھریزگ ءَ سنگین نہ اِنت، بلکیں مناپکی ءِ ربیت ءُ بے بیسھی ءَ پیش دارگ ءَ اِنت۔
آئی ءَ گوشتگ کہ نوں یک روچے سرجم بیتگ ءُ زورگریں ریاست ءِ کِر ءَ تیوک ءَ بیست ءُ چار ادار پشت کپتگ۔ اگاں داں داتگیں وھد ءَ پاکستان ءَ پہ بندیگانی یل کناھینگ ءَ گامگیج نہ زرت گڑا درسیں بندیگ بلوچ آمیدگس ءَ پیش کنگ بنت۔ اود ءَ آیانی سر ءَ بلوچستان ءَ ریاستی زوراکی، نوک آبادکاریں زورگپتی، چکچینی، لٹ ءُ پل ءُ جنگی میارباریانی ناشرکاری ءَ ھوار بوگ ءِ بھتام ءِ رد ءَ کیس کنگ بیت۔
جارکش ءَ گوشتگ کہ اے جستءُپرس زوت گوں تچک ءُ ساپی ءَ بیت ءُ میارباری ءِ سرزد بوگ ءِ سر ءَ بلوچ راجی راھبند ءِ رد ءَ میاربار سزا دیگ بنت۔ پاکستان ءُ آئی لشکری ادارہ اگاں سرپد بنت کہ چہ وھد زوالی ءُ بے سریں پندلاں جاور گر ءُ دار کنگ بنت گڑا اے آیانی زنڈیں ردی یے۔ بی ایل اے وتی ھمک جار ءِ سر ءَ سرجم ءَ کار کنگ ءِ توان ءُ بودناکی ءِ کول ءَ کنت۔
آئی ءَ گوشتگ کہ اے راستی تچک بیتگ کہ پاکستانی لشکر نہ تیوک ءَ پہ وتی کارمندانی جان ءِ پرواہ ءَ نہ دار ایت ءُ نہ آ پہ گپ ءُ تران ءَ سنگین بوگ ءِ جھد ءَکنت۔ اگاں اے داتگیں وھد ھلاس بوت اَنت گڑا ھمک ادار ءَ پنچ بندیگ بلوچ آمیدگس ءِ گوشگ ءِ ھساب ءَ سزا دیگ بیت۔
جارکش ءَ گوشتگ کہ بی ایل اے دژمن ءَ گڈی موہ ءَ دیگ ءَ اِنت کہ آ پندل سازی ءَ یل بہ کنت ءُ زمینی راستی ءَ بہ من ایت، چہ وتسریں گپ ءَ ابید گوں راستی ءَ دیم پہ دیمی بہ کنت ءُ پہ بندیگانی یل کناھینگ ءَ گامگیج بزورایت۔ اگاں نہ بلوچ راجی گھگیری ءِ سوڑگ ءَواتری نیست ءُ ھمک دمان پہ دژمن ءَ گیش ترندیں آسر پیش دارایت۔
