بلوچ لبریشن آرمی ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں نال ، شال ءُ سامی ءَ سے جتائیں کاروائیاں زورگریں پاکستانی لشکر ، کشنده ٹولی ءِ کارمند ءُ چاریگی کیمره نشانگ کرتگ اَنت.
آئی ءَ گوشتگ که بی ایل اے ءِ سرمچاراں پنچ مارچ ءَ ھزدار ءِ ھند نال ءِ شھر ءَ زورگریں پاکستانی لشکر ءُ چیریں ادارھانی جوڑ کرتگیں کشنده ٹولی ءِ سروک سمد سمالانی گوں چیر کرتگیں شورھاں نشانگ کرتگ، تراک ءِ زد ءَ اتکگیں دژمنیں لشکر ءِ کارمند سکا ٹپی بیتگ بلے آدگه سے کارمند جاھی مرتگ اَنت ءُ آیانی گاڑی ھم تباه بیتگ۔
جارکش ءَ گوشتگ که سمد سمالانی نال، گریشگ، پنجگور ءُ کش ءُ کراں زورگریں لشکر ءِ چیردستی ءَ وتگڑیں کشنده ٹولی ءِ سروکی ءَ کنگ ءُ لشکری زوراکیاں، گسانی چادر ءُ چاردیوالی ءِ پادمال ءُ مردمانی زوریں بیگواھیاں زورگریں لشکر ءِ کمک ءَ تچک ءَ ھوار بیتگ ءُ چه ایشی ءَ ابید ھمے ھنداں بلوچانی نشانگ کنگ ءَ ھم ھوار بیتگ۔
آئی ءَ گوشتگ که زورگریں لشکر ءَ بلوچ کُشیں کارانی بدل ءَ سمد سمالانی ءَ منشیات ءِ بھا کنگ ، باج گِرگ ءُ دزی ءِ موکل داتگ. سمد سمالانی ءَ راگے ، ھب ءُ کودگ ءَ دژمنیں لشکر ءِ سروکی ءَ مردمانی زمین گپتگ ءُ دستیگ کرتگ اَنت، ھمے وڑ ءَ کھولانی لاچار کنگ ءُ جنکانی زورانسری سور دیگ ءَ ھم سمد سمالانی ءُ آئی ءِ ٹولی ھوار بیتگ.
جارکش ءَ گوشتگ که سمد سمالانی راجی میاربارے ءِ بنیاد ءَ بی ایل اے ءِ سرمچارانی نشانگ ءَ بیتگ ءُ گوں آئی ءَ ھواریں آدگه سرجمیں مردم ھم تچک ءَ سرمچارانی نشانگ ءَ اَنت۔
آئی ءَ گوشتگ که نال ءَ بمب اُرش ءِ نشانگ تچک ءَ سمد سمالانی ءُ آئی ءِ کارمند بیتگ اَنت ، بلوچ سرمچارانی لوٹ لس مردمانی چه تاوان دیگ ءَ دور دارگ بیتگ بلے دژمنیں لشکر ءُ آئی ءِ کارمند په وتی رکینگ ءَ لس مھلوک ءَ کارمرز کن اَنت. ھمے سوب ءَ گوں پھریزگ ءَ ھوار بلے انگت ءَ لس مردمانی تاوان ءِ گمان اِنت. راجی آجوئی ءِ جھد ءَ لس مردمانی تاوان په ما گران اِنت ، ما گوں بلوچ راج ءَ لوٹ کن اِیں که په لس تاوان ءِ رکینگ ءَ وت ءَ چه زورگریں لشکر ءُ آئی ءِ کاسگ چٹاں ( کشنده ٹولیاں ) دور به دار اَنت.
جارکش ءَ گوشتگ که دگه کارے ءَ بی ایل اے ءِ سرمچاراں 4 مارچ ءِ شپ ءَ شال ءَ کمبرانی دگ ءَ زورگریں پاکستانی لشکر ءِ چوکی یے گوں دستی بمب ءَ نشانگ کرتگ.
آئی ءَ گوشتگ که سرمچاراں دگه یک اُرشے ءَ کیچ ءِ ھند سامی ، گیشکور ءَ چه زورگریں پاکستانی لشکر ءِ نیمگ ءَ سے جتائیں جاھاں جتگیں چاریگی کیمره ءُ گوں آیاں بندوکیں سامان نشانگ کرتگ ءُ تباه کرتگ اَنت.
