زور بیگواھیں شبیر بلوچ ءِ گھار سیما بلوچ ءَ وتی شنگ کرتگیں تامربندے ءَ گوشتگ کہ ما داں سے روچ ءَ یاسر ھمید ءُ جنید ھمید ءَ ھوار پہ آدگہ زور بیگواھیں مردمانی آجوئی ءَ بوانی ءَ زھرشانی ءَ نندوک بیتگ ایں اود ءَ مارا گوں آدگہ زھرشانی کنوکیں جنینانی ھمراھی ءَ دزگیر کرتگ ءُ تانہ ءَ برتگ۔ گر ءُ چیل بیگ ءِمیان ءَ مئے دست ءُ پاد ٹپی بیتگ اَنت، تانہ ءِ تہ ءَ مارا سکا سسائی آزار اش داتگ۔
سیما بلوچ ءَ گوشتگ کہ پولیس کارمنداں مارا زور داتگ کہ شما وتی مردماں بہ گوش اِت کہ دگ ءَ پچ بہ کن اِت، اگاں نہ ما شمارا داں دیر ءَ زندان ءَ بندیگ کن ایں۔اے بابت ءَ ما گوشتگ کہ ما چہ وتی بیگواھیں براتاں شرتر نہ ایں اگاں مئے برات انچو وھد بیگواہ اَنت ما ھم پہ زندانی بوگ ءَ جاڑیگ ایں۔
آئی ءَ گوشتگ کہ ما داں ھژدہ ادار ءَ زندان ءِ تہ ءَ ھما جنجال دیستگ اَنت گڑا ھمے گمان کرتگ کہ چہ سالاں مئے بیگواھیں برات گوں کجام جنجالانی دیمپان اَنت۔
آئی ءَ گڈی ءَ گوشتگ کہ پہ بلوچ راج ءَ گھگیری ءَ ابید دگہ ھچ راہ پشت نہ کپتگ۔
