بلوچ یکجھتی کمیٹی ءِ سروک زور بیگواھیں ڈاکٹر دین مھمد جنک سمی دین ءَ ماں رسانکدر ءَ وتی شنگ کرتگیں درشانےءَ گوشتگ کہ شال، سوراب، ھب، تربت ءُ مستونگ ءَ زوریں بیگواھیانی بگیری ءَ زھرشانی نندانک برجاہ اَنت ءُ شھدگ انگت ءَ بند اَنت۔
آئی ءَ گوشتگ کہ کراچی ءِ ھند ملیر ءَیاسر بلوچ ءِ زوریں بیگواھی ءِ بگیری ءَ داں ھشت اداراں زھرشانی کنگ بیتگ ءُ پد ءَ ھلاس بیتگ۔ کھولءَ پہ یاسر ءِ آجوئی ءَ انتزامیہ ءَ دو روچ ءِ وھد داتگ ءُ گوشتگ کہ اگاں آ داں دو روچ ءَ آجو کنگ نہ بوت گڑا ما وتی آھوکیں گامگیج ءِ جار ءَ جن ایں۔
سمی دین ءَ گوشتگ کہ بلوچستان ءِ جتائیں ھنداں زور بیگواھیں مردما نی کھول رمزان ءِ ماہ ءِ بندات ءَ ھم دگانی سر ءَ زھرشانی کنگ ءَ لاچار اَنت۔ وھدے کہ سرکارگپ ءُ تران ءَ بے سوب بیتگ۔ چہ انتزامیہ ءِ نیمگ ءَ پہ زھرشانیانی ھلاس کنگ ءَ کھولاں ترسینگ ءُ بیھار دیگ ءَاَنت۔
آئی ءَ گوشتگ دانکہ سرکار پہ زوریں بیگواھیانی دارگ ءَ دلجمیں گامگیجے نہ زور ایت گڑا لس بلوچ پہ وتی آزیزانی زوریں بیگواھی ءِ بگیری ءَ زھرشانی کن اَنت ءُ پہ آیانی آجوئی ءَ ھرپیمیں جھد ءَ برجاہ دار اَنت۔
