ھب چوکی: زورگریں پاکستانی لشکر ءِ دست ءَ چہ جتائیں وھد ءُ جتائیں جاھاں زور بیگواہ کنگ بیتگیں مردمانی کھولاں بوانی ءَ شال کراچی شھدگ بند کرتگ ءُ نشتگ اَنت۔
زھرشانی ءَ زور بیگواھیں یاسر ھمید، جنید ھمید، نسیر بلوچ ندیم بلوچ ءُ اھسان بلوچ ءِ کھول نشتگ اَنت۔ چہ بیگواھیں مردمانی کھولاں ابید بی وائی سی کراچی ھنکین ءِ سروک ءُ آدگہ سْیاسی ءُ چاگردی کارکناں بازیں کچے ءَ بھر زرتگ۔
زھرشانی ءَ نشتگیں مردمانی گوشگ اِنت کہ چہ ایشی ءَ پیش ھم ما پہ وتی آزیزانی آجوئی ءَ ھمے جاہ ءَ داں سے روچ ءَ نشتگ ایں ءُ چارمی روچ ءَ ھب انتزامیہ ءَ مارا دروگیں دلبڈی داتگ کہ شمئے مردم زوت کنگ بنت ءُ مارا بیست روچ ءِ وھد لوٹ اِتگ گڑا ما آئی ءِ سر ءَ بیسہ کرتگ ءُ وتی زھرشانی ھلاس کرتگ۔
آئی ءَ گوشتگ کہ بیست روچ ءِ گوزگ ءَ پد چہ سرکار ءُ ھب انتزامیہ ءِ نیمگ ءَ پہ مئے آزیزانی آجوئی ءَ ھچ وڑیں گامگیج زورگ نہ بیتگ گڑا ما لاچار بوتگ ایں ءُ دگ بند کرتگ۔
آیاں گوں کِر ءُ کشانی ھندانی مردماں لوٹ کرتگ کہ بیا اَنت ءُ مئے زھرشانی ءَ ھوار بہ بنت ءُ پہ مئے زور بیگواھیں مردمانی آجوئی ءَ توار چست بہ کن اَنت۔
آیاں گوشتگ دانکہ مئے مردم آجو کنگ نہ بوتگ اَنت ما وتی زھرشانی ءَ برجاہ دار ایں۔
