مٹ بیتگیں جھانی جاورانی سر ءَ گپ جنان بلوچ راجی زْرمبشت ( بی این ایم ) ءِ دری تک ءِ راھوتکار نیاز ءَ گل ءِ مراگشے ءِ تہ ءَ گْوشتگ انی جاور گوں تیزی ءَ مٹ بیگ ءَ اَنت بلوچ راج ءَ سما بہ بیت۔امریکا ءَ سرکار ءِ مٹ بیگ ءِ پجیگ ءَ دری شوندات مٹ بیتگ اَنت کہ آئی ءِ سرجمیں جھان ءِ سر ءَ سان بہ اَنت۔امریکا نی گوں ھرچ ڈیھ ءَ دو نیمگی سیادیاں گیشتر ارزشت دیگ ءَ اِنت ءُ وت ءَ چہ دگرانی جیڑھاں دیر دارگ ءِ کوشست کنگ ءَ اِنت۔
آئی ءَ گْوشتگ پہ امریکا ءَ آئی ءِ گزرانکی جاور گیشتر ارزشت دار اَنت ءُ آئی ءِ دیم ءَ چین میلانک اِنت ءُ امریکا آئی ءَ دارگ لوٹ ایت۔ مئے دمگ ءَ سی پیک ءُ چین ءِ تازی ڈیھانی سر ءَ سان مزنین ڈاہ اَنت ، روس ھم مزنیں توانے کہ ڈالچار کنگ نہ بیت۔
آئی ءَ گْوشتگ میان استمانی واکاں جھان ءِ جیڑھانی مٹائینگ ءِ بودشت ھست ، گوں آیانی سیتاں باندات بندوک اِنت۔چین گوادر ءَ زری جنگی گرابانی بنجلے ٹاھینگ ءَ دلمانگ اِنت کہ چہ ایشی ءَ روکپتی توان وش نہ اَنت۔
نیاز ءَ دلگوش پرینتگ کہ درانڈیھ ءَ نندوکیں بلوچ سیاسی کارانی تہ ءَ وتی ھواری ءُ ھمراھی ءَ گیش بہ کن اَنت ءُ چہ تازی ڈیھانی ( عرب ڈیھ ) نیمگ ءَ پہ پاکستان ءَ ھمدردی ، پلہ مرزی ءُ کمکاں دارگ ءِ کوشست بہ کن اَنت۔ پاکستان مردمی اگبالانی لگتمالی ءِ پد ءَ جھان ءَ نادوستیں ڈیھے۔ مارا جھان باور کنائینگی اِنت کہ آزاتیں بلوچستان دمگ ءَ پرایمنیں ڈیھے بیت۔
آئی ءَ گْوشتگ پاکستان ءِ تہ ءَ ھم پرشت ءُ پروش ءُ پہ واکداری ءَ گر ءُ چیل گیش بیتگ ءُ آئی ءِ درسیں سیمسر ناایمن اَنت۔ گلگت بلتستان ، کشمیر داں پنجاپ ءِ تہ ءَ ھم چہ پاکستانی لشکر ءَ بیزاری درشانگ بیگ ءَ اِنت۔پاکستان درسیں جھانی بینکانی وامدار اِنت۔پاکستان ءِ گْور ءَ مزنیں شرکتے ءِ کچ ءَ ھم مڈی پشت نہ کپتگ۔چہ بلوچستان ءِ مڈیاں تیوک ءَ پنجاب ءِ والینگ کوشست بیگ ءَ اِنت۔پاکستان ءَ واکداری ءِ بنجاہ سستگ ءُ شنگ اتگ ءُ بلوچستان ءِ سر ءَ پاکستان ایوک ءَ وتی لشکر ءِ پارست ءَ زورگر اِنت۔
اے مراگش بی این ایم ءِ وانگ ءُ زانگی تک ءِ نیمگ ءَ برجم دارگ بیتگ ءُ بی این ایم کیچ گوادر ھنکین مھمانجل بیتگ۔
