سوراب: زوربیگواھیں جھانزیب بلوچ ءِ کھول ءِ نیمگ ءَ برجاھیں زھرشانی نندانک ءِ سر ءَ کشندہ ٹولی ءِ کارمنداں بیڑ برتگ ءُ جنین لٹ شاپ کرتگ اَنت۔
بلوچ یکجھتی کمیٹی سوراب ھنکین ءَ ماں رسانکدر ءَ وتی شنگ کرتگیں درشانے ءَ گوشتگ کہ کشندہ ٹولی ءِ کارمنداں گوں زھگ ءُ جنیناں زوراکی کرتگ۔ چہ لٹ شاپ ءَ دو جنین ٹپی بوتگ آ پہ درمان کنگ ءَ نادراھجاہ ءَ برگ بوتگ اَنت۔
آئی گوشتگ کہ ما سرکاری ادارھاں ھمے کلوہ دیگ لوٹ ایں کہ اد ءَ نشتگیں مردمانی سر ءَ درسیں زوراکیانی زمہ وار سوراب انتزامیہ اِنت۔
آیاں چہ سوراب ءِ مھلوک ءَ زھرشانی نندانک ءَ بھر زورگ ءِ لوٹ کرتگ ءُ گوشتگ کہ گیش ءَ چہ گیش زھرشانی نندانک ءَ بھر بہ زور اَنت۔ مارا انچو گمان بیت کہ کشندہ ٹولی ءِ کارمند یک برے پد ءَ مئے سر ءَ اُرش کن اَنت۔
