تربت: بلوچ یکجھتی کمیٹی ءِ سروک سبگت اللہ شاہ جی ءَ تربت پریس کلب ءَ پریس کرتگ ءُ گوشتگ کہ چہ گوستگیں لھتیں ماھاں کیچ ءُ مکران ءَ ھوار سرجمیں بلوچستان ءَ زورگریں پاکستانی لشکر بلوچ ءِ پُسگاں گچین کنگ ءُ شھید کنگ ءَ اِنت۔ ما شر سرپدیں کہ اے زورگریں پاکستان ءِ بلوچ چُکچینی ءِ نوکیں شوربندی یے۔ چہ ھمے نوکیں شوربندیءَ بلوچ پُسگ یکرندے پد ءَ زور بیگواہ کنگ ءُ دژمن ءِ آزار جاھاں آزار دیگ بنت ۔بلے اے رندی ھمے شوندات ءَ جتائیں دروشماں کارمرز کنگ ءَ انت۔ وھدے کہ یک بلوچ پسگے زوربیگواہ کنگ بیت گڑا کھول آئی ءِ زوریں بیگواھی ءِ بگیری ءَ دگ ءُ راھانی سر ءَ زھرشانی کن اَنت ریاستی ادارہ لاچار بنت زوربیگواھیں مردماں آجو کن اَنت۔ بلے پد ءَ ھمے گندگ بوگ ءَ انت کہ آجو بوتگیں مردم گوں جتائیں وڑ ءُ پیماں نشانگ کنگ ءُ شھید کنگ بنت، چہ ایشی ءَ ابید پاکستان بلوچ ءِ وانندگ ءُ زانتکاریں مردماں گچین کنت ءُ شھید کنت۔ ھمے نوکیں شوندات ءِ رد ءَ گوستگیں دو ماہ ءِ تہ ءَ چہ ھشت ءَ گیش بلوچ پسگ شھید کنگ بیتگ۔
آئی ءَ گوشتگ کہ گوستگیں روچ ءَ ھمے تربت شھر ءَ زورگریں پاکستانی چیریں ادارھانی کارمنداں بلوچ ءِ وانندگ ءُ زانتکاریں پسگ اللہ داد ء واھد گمشاد ھوٹل ءَ تیرجتگ ءُ شھید کرتگ۔ اللہ داد ءِ وانگ کراچی زانشجاه ءَ بُندپتر ءِ تھر ءَ آسر بیتگ ءُ اِے وھداں اسلام آباد ءَ وتی وانگ ءَ دیم ءَ برگ ءَ بیتگ. چہ ایشی ءَ ابید اللہ داد وانگ، نبشتکاری، رجانک کنگ ءُ کتاب چاپ ءُ شنگ کنگ ءِ پڑا باسمائیں مردمے بیتگ۔ داد چہ بلوچ چاگرد ءِ وانندگ ءُ سرپدیں مردماں یکے بیتگ۔ ما سرپد بئیں کہ بلوچ ءِ دژمن بلوچ چاگرد ءِ وانندگ ءُ سرپدیں مردماں اوپار نہ کنت ءُ آھاں وڑے نہ وڑے ءَ تاوان دنت ءُ ھمے وڑ ءَ شھید کنت۔ اللہ داد ءِ وڑیں وانندگ ءُ سرپدیں بلوچ پسگانی شھید کنگ ءِ دژمن ءِ مول ءُ مراد ھمیش اِنت کہ بلوچ چاگرد چہ وانندگ ءُ زانتکاریں مردماں زبھر کنگ کنگ بہ بیت ۔
آئی ءَ گوشتگ کہ انوں گوستگیں دو ماہ ءَ اللہ داد ءِ ویل ءَ ھوار مکران ءِ جتاجتائیں دمگ ءُ سرجمیں بلوچستان ءَ ھشت بلوچ پسگ ھمے وڑ شھید کنگ بیتگ۔ 30 نومبر 2024 ءَ آواران ءَ پکیر جان ء سید مھمد ، ھسا بلوچ ء نوردین شھید کنگ بیتگ انت، اے دوئیں بلوچ پسگ پاکستان ءِ چیریں آزار جاھاں بندیگ بیتگ اَنت، پکیر جان 26 ستمبر 2024 ءُ ھسا بلوچ 17 پروری 2023 ءَ پاکستانی لشکر ءَ بیگواہ کرتگ اَنت ءُ پدا شھید کرتگ اَنت۔ 27 دسمبر ءَ ماں تمپ ءَ زریپ ء اومربیگواہ کنگ ءُ سکا آزار دیگ ءُ شھید کنگ بیتگ۔ ھمے وڑا 11جنوری ءَ ماں گوادر ءَ زکریابلوچ شھید کنگ بیتگ ، زکریا 27 ستمبر 2024 ءَ بیگواہ کنگ بیتگ ءُ لھتیں وھد ءَ پد یل کنگ بیتگ ءُ 11جنوری نشانگ کنگ ءُ شھید کنگ بیتگ۔11جنوری ءَ زھری ھزادر ءَ پاکستانی لشکرءَ زوراکی ءِ میان ءَ یک 16سالی ورنا یے شھید کرتگ۔ ھمے وڑیں یک دردناکیں ویلے 12جنوری ءَ بیتگ۔ اپزل منزور 10دسمبر 2024 ءَ پاکستانی لشکر ءَ چہ آپسر تربت ءَ بیگواہ کرتگ ، ھما اولی روچ ءَ اپزل ءِ کھول ءِ مردم زھرشانی کنگ ءَ بیتگ اَنت بلے 12جنوری ءَ اپزل منزور گوں بمب ءَ تراکینگ ءُ شھید کنگ بیتگ ءُ اے ویل ءَ رند دژمن ءِ پولیس ءُ لشکر ھمے بیان داتگ کہ اپزل منزور بمب تراک ءَ کشگ بیتگ ، بلے اے گپ ءَ سرجمیں کیچ گواہ اِنت کہ اپزل 10دسمبر ءَ بیگواہ کنگ بیتگ ءُ پاکستان ءِ چیریں آزار جاھاں بند بیتگ ءُ آئی ءِ کھول ءِ مردم یکشل ءَ زھرشانی کنگ ءَ بیتگ اَنت۔ ھوشاپ زیروپوائنٹ ءَبیگواھیں مردمانی کھول ءِ نیمگ ءَ برجاھیں نندانک ءَ ریاستی دلاراں وتی گاڑی ھمے مھلوک ءِ سرءَ گوازینتگ چہ ایشی ءَ جھانزیب نامیں ورنا یے ٹپی بیتگ ءُ 14جنوری ءَ جھانزیب شھید بیتگ۔ 25جنوری ءَ ماں مشکے ءَ پنڈوک ء سومار پاکستانی لشکر ءَ دگہ دو مردم ءِ ھواری ءَ گپتگ آزار داتگ ءُ پدءَ شھید کرتگ۔ آئی آ دگہ دوئیں ھمبراہ یل کنگ بیتگ اَنت ۔ ھمے وڑا 4 پروری ءَ اللہ داد ءِ واھد ماں گمشاد ھوٹل تربت ءَ تیرگواری کنگ ءُ شھید کنگ بیتگ۔
آئی ءَ گوشتگ کہ بلوچ یکجھتی کمیٹی ھمے سرپد بیت زورگریں ریاست پاکستان ءَ بلوچ چکچینی شوربندی مٹ کرتگ ءُ نوکیں دابے ءَ بلوچ پسگاں جنگ ءُ کشگ ءَ اِنت ءُ چہ اے کار ءَ زانگ بیت پاکستان بلوچ چکچینی ءِ تہ ءَ تیزی آرگ ءَ اِنت ۔ ما بلوچ چکچینی ءِ اے نوکیں شوربندی ءِ بگیری ءَ ھچ وڑ ءَ بے توار نہ بہ این ءُ ما بلوچ مھلوک ءَ گوں ھمے دزبندی کن ایں کہ وتی مردمانی کوش ءِ بگیری ءَ ھچ وڑ ءَ بے توار مہ بہ اِت ، ما ھمنچو توار بہ ایں اے ریاست ھمنچو گیش مئے مردماں جنت ءُ شھید کنت ۔بی وائی سی بلوچ پسگانی جنگ ءُ کشگ ءِ بگیری ءَ ماں تربتءَ 9 پروری داں 11پروری ءَ شھید پدا چاراہ ءَ یک سئے روچی زھرشانی گدانے جنت ءُ آئن لائن مراگش کنت۔ ما شھید بیتگیں بلوچ پسگانی کھول ءُ سرجمیں کیچ ءِ مردمانی گون ءَ دز بندی کن ایں کہ اے سئے روچ ءَ بیا اَنت گدان ءَ بھر بزور اَنت ءُ بلوچ پسگانی کوش ءِ بگیری ءَ توار چست بہ کن اَنت ۔
