ھاران: پاکستانی لشکر ءِ دست ءَ زور بیگواہ کنگ بیتگیں مبارک بلوچ ءُ ھزرت الی بلوچ ء میر اھمد ءِ کھول ءَ نیمگ ءَ آیانی زوریں بیگواھی ءِ بگیری ءَ مرچی دومی روچ ءَ ریڈ زون ءَ زھرشانی نندانک برجاہ بیتگ۔
زھرشانی نندانک ءَ کھول، سیاسی ءُ چاگردی کارکناں ھوار جتائیں بھرگاں سیادی داروکیں مردماں بازیں کچے ءَ بھر زرتگ ءُ نشتگ اَنت۔
کھول ءِ گوشگ اِنت کہ دوئیں برات مبارک بلوچ ءُ ھزرت الی ءَ دو روچ پیش پاکستانی لشکر ءَ آوار جتگ ءُ بیگواہ کرتگ اَنت کہ انگت ءَ آیانی ھچ وڑیں ھال نیست۔ پہ مئے زھگانی آجوئی ءَ سرکار ءِ نیمگ ءَ ھچ وڑیں گامگیج زورگ نہ بیتگ۔
آئی ءِ گوشگ اِنت کہ مئے لوٹ گوں سرکار ءَ ھمیش اِنت اگاں مئے زھگانی سر ءَ چونیں بھتامے ھست گڑا آمیدگس ءَ پیش کنگ ءُ سزا دیگ بہ بنت، اگاں بے میار اَنت گڑا زوت یل کنگ بہ بنت۔
