شال: پہ زور بیگواھیں مردمانی پد جنگءَ شدکشیں زھرشانی گدان ءَ 5716 روچ سرجم بیتگ۔ آدینگ ءِ روچ ءَ بی این پی ءِکونسلر گلام رسول ایڈوکیٹ ءُ امران میروانی ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ چہ 1948 ءَ ریاستی ادارہ بلوچ راج ءِ بگیری ءَ کارکنگ ءَ اَنت۔ بلوچ راجءِ درسیں ھک پلگ بیتگ اَنت ءُ بلوچستان جھندم جوڑکرتگ۔ ریاست لوٹ ایت کہ بلوچ چہ وتی واک ءُ راجی پجار ءَ دزکش بہ بیت بلے اے وڑ نہ بیت۔
آئی ءَ گوشتگ کہ مرچی بلوچ وتی پدریچ ءِ جنگءَ مڑگ ءَ اِنت، اے جھد ءِ میان ءَ ھزارانی کچ ءَ بلوچ زور بیگواہ کنگ ءُ ھزارانی کچ ءَ کشگ ءُ ژانگولیں لاش چگل دیگ بیتگ ۔ ھچ راج پہ توپک ءِ زور ءَ دارگ نہ بیت، ریاست ءَ وتی اے کینگ یل کنگی اِنت۔ پاکستان ءَ زوراکی ءِ درسیں وڑ ءُ پیم چکاس اتگ اَنت۔
