بلوچ نیشنل موومنٹ ءِ انسانی ھکانی داراہ پانک ءَ ماں رسانکدر ءَ وتی شنگ کرتگیں درشانے ءَ آواران ءِ ھند مشکے مزار آباد ءَ پاکستانی لشکر ءِ دست ءَ پنڈوک ء سومار ءِ درکانودی کوش ایر جتگ ءُ گوشتگ کہ 14 جنوری ءَ شھیب ء گلام رسول ءُ ایوب ء دل مراد ءِ ھواری ءَ پنڈوک ء سومار چہ گس ءَ زور بیگواہ کنگ بیتگ۔ پنڈوک ءَ درکانودی کوش ءَ پیش سکا آزار داتگ۔ آئی لاش دوشی 25 جنوری ءِ شپ ءَ کھول ءِ دست ءَ دیگ بیتگ، شھیبءُ ایوب چہ ایشی پیش آجو بیتگ اَنت۔
آئی ءَ گوشتگ کہ اے ناشری بلوچستان ءَ انسانی ھکانی ٹوھیں بگیری یے۔ ایشی ءِ تہ ءَ زوریں بیگواھیءُ درکانودی کوش ھم ھوار اَنت۔ پہ میارباری ءِ چیر دیگءُ سانمندیں کھولءِ بے توار کنگ ءَ پہ زانت دامگ بند کنگ بیتگ۔
آئیءَ گوشتگ کہ پانک اے وڑیں زوراکیانی زوت دارگ ءُ پنڈوک ء سومار ءِ کوش ءِ بابت ءَ پہ دلجمی پٹ ءُ پول ءُ ھمے ھند ءَ دامگ ءِ پچ کنگ ءِ لوٹ ءَ کنت۔ میان استمانی ادارہ پاکستان سرکار ءَ جست بہ کن اَنت ءُ بلوچاں پہ انساپ دیگ ءَ جھد بہ کن اَنت۔
