سند: جی ایم سید ءِ ودی بوگ ءِسد ءُ بیستءُ یکمی سالروچ ءِ درگت ءَ سندھودیش روولیوشنری آرمی(ایس آر اے) ءِ سروک سید ازگرشاہ ءَ وتی شنگ کرتگیں کلوھے ءَ گوشتگ کہ گْوستانکی مردم گوستانکی پگر ءُ لیکہ بکش اَنت ءُ وتی راج ءَ گوں آجوئی ءُ وشھالی ءَ ھمگرنچ کن اَنت گڑا راج مدام آیاں گیرکار اَنت۔ بیستمی کرن ءَ جی ایم سید ءَ سندھودیش ءَ ھما گوستانکی پگر ءُ لیکہ داتگ کہ چہ ایشی ءَ نہ تیوک ءَ سندی راج گوں وتی وتن، زبان، گوستانک ءُ دودمان ءَ آشنا کرتگ بلکیں وت چو ھمالیہ ءِ کوہ ءَ مِک بیتگ ءُ داں گڈی وھد ءَ یک وڑ ءَ اوشتاتگ ءُ وتی جھدے برجاہ داشتگ۔
آئیءَ گوشتگ کہ سائیں جی ایم سید ءَ وتی زندگی ءِ گڈی دمان ءَ ھم سندی راج ءَ پہ سرڈگار ءَ جھد کنگ ءِ سکیں داتگ ءُ چہ ما گسر بیتگ، بلے آئی سندھودیش ءِ گوستانکی ءُ بے دروریں لیکہ مرچی ھم پما مادنیں کشکے ءُ مدام مئے رھشونی ءَ کنگ ءَ اِنت۔
سید ازگر شاہ ءَ گوشتگ کہ پاکستانی ریاست ءِ ھپتاد ءُ ھپتمی سال ءَ راجی ایردستی ءِ سوب ءَ سند نگیگیں جاورانی دیمپان اِنت ءُ پہ سند ءِ ھستمان ءِ ھلاس کنگ ءَ باز ترسناکیں سوڑگ ءُ ارش کنگ بیتگ۔ اے وھد ءَ گرین پاکستان انیشیٹو” ءُ” کارپوریٹ پارمنگ ” شوربندیانی سر ءَ کار کنگ ءُ پہ سند ءِ مدامی تباہ کنگ ءَ پیسلہ کنگ بیتگ۔ زورگریں پنجاپ یک نیمگے ءَ گرین پاکستان شوربندی ءِ نام ءَ چہ سند دریا ءَ گوز کشگ ءُ وتی ھشکیں ڈگاراں سرسبز کنگ لوٹ ایت ءُ سند ءِ سرسبز ءُ زیبائیں ڈگاراں ھشک ءُ ریگستان کنگ لوٹگ ءَ اِنت۔ گڑا دومی نیمگ ءَکارپوریٹ پارمنگ پروجیکٹ ءِ نام ءِ سر ءَ لشکر ءِ پارست ءَ لکانی کچ ءَ ایکڑ ڈگاراں چیرترینگ لوٹگ ءَ اِنت۔ پمشکا مئے رھشون جی ایم سید ءَ گوشتگ اَت کہ سند ءُ پاکستان یکے دومی ءِ دژمن اَنت۔ اگاں پاکستان بہ بیت گڑا سند تباہ بیت، پمشکا سندی پدریچ ءِ چہ پاکستان ءَ رکینگ ھژدری اِنت۔
آئی ءَ گوشتگ کہ من سندی راج ءَ یات دیگ لوٹ آں کہ مئے رھشون ءَ چہ پاکستان ءَ آجوئی ءِ گپ جتگ ءُ آجوئی پہ وشی گرگ نہ بیت، پہ آجوئی ءَ جنگ کنگ لوٹ ایت۔ پمشکا مارا جنگ کنگ ءُ جنگ کٹگ لوٹ ایت، گڑا ما وتی بنکی ڈیھ ءَ آجو کرت کن ایں۔ گڈی ءَ مئے رھشون جی ایم سید ءِ مرچی ودی بوگ ءِ روچ ءِ درگت ءَ من گوں آئی لیکہ ءَ وپا کنگ ءِ کول ءَ کنان، ستک شانی ندر کنگ ءَ ھوار سند ءَ ڈن نشتگیں سندی ءُ جھان ءِ مردمان ءَ سائین ءِ ودی بوگ ءِ سالروچ ءِ درگت ءَ مراد بات گوش آں۔
