بلوچ نیشنل ( بی این ایم ) ءِ انسانی ھکانی ادارہ ’’ پانک‘‘ ءَ دسمبر 2024 ءِ میان ءَ بلوچستان ءَ برجاھیں انسانی ھکانی بگیری ءِ سر ءَ رپورٹ شنگ کرتگ۔رپورٹ ءِ رد ءَ ، پاکستانی لشکر ءَ 22 کس زور بیگواہ ءُ پنچ در آمیدگسی کشتگ ۔
رپورٹ ءَ گْوشگ بیتگ کہ اے مردم چہ بلوچستان ءِ شش ھنکیناں زور بیگواہ کنگ بیتگ اَنت، چہ ایشاں کیچ ءَ چہ درساں گیش 10 کس ، چہ گوادر ءَ 6 ، چہ ڈیرہ بگٹی ءَ 2 ، چہ ھاران ءَ 1 ، ءُ چہ ھب ءَ یک کسے پاکستانی لشکر ءُ گوں آئی ءَ ھمگرنچیں ادارھاں ناراھی دزگیری ءَ پد زور بیگواہ کرتگ اَنت۔
چو مدامی رنگ ءَ چہ پانک ءِ نیمگ ءَ اے گْوشگ بیتگ کہ زور بیگواھیں مردمانی کچ چہ ایشی ءَ گیشتر بیت کنت پرچا کہ سانمندیں مردمانی کھول چہ ترس ءَ ھچ نہ گْوش اَنت۔زور بیگواھیانی پد ءَ کھول روانی تک ءَ نادْراہ اَنت ، انساپ ءُ ریاست ءِ جست ءُ پرس ءِ ھچ راہ نیست۔
رپورٹ ءِ رد ءَ پاکستانی لشکر ءَ پنچ کس در آمیدگسی کشتگ۔کیچ ءَ نوید ء ھمید ءُ زریپ ء امر در آمیدگیسی کوش ءِ نشانگ کنگ بیتگ اَنت ءُ ماں پنجگور ءَ پاکستانی لشکر ءِ ڈرون ارش ءَ ابدل ھمید ، ذاکر ءُ دلجان کشگ بیتگ اَنت۔
پانک ءَ یک برے پد ءَ پہ انسانی ھکانی بگیری ءِ گر ءُ دار ءَ زیتیں میان استمانی دزمانجنی ءِ لوٹ کرتگ۔
