نیشنل ڈیموکریٹک پارٹی ءِ جارکش ءَ وتی درشانے ءَ گْوشتگ کہ این ڈی پی گرینڈ ھیلتھ الائنس ءِ سرکماش ڈاکٹر بھار شاہ ءُ ڈاکٹر ھپیز مندوھیل ءِ نام ءَ کُرتگیں وتگڑیں ایپ آئی آر ءُ پد ءَ آیانی دزگیر کنگ ءَ گوں تُرندیں دانکاں ایرجنت۔اے کار نہ ایوک ءَ درکانودی یے بلکیں چاگرد ءِ راھبندانی ھم بگیری اِنت۔ڈاکٹر بھار شاہ ءُ گرینڈ ھیلتھ الائنس ءِ آدگہ باسکاں چُنت ماہ اِنت کہ جاندُراھی بھرگ ءِ تہ ءَ بیتگیں جیڑھانی سر ءَ جاک ءُ سلوات کنگ ءَ اَنت۔ بلے سرکار آیانی جیڑھاں گیش ءِ گیوار کنگ ءِ جاہ ءَ وڑ وڑیں پندل سازگ ءُ آیاں بےتوار کنگ ءِ جُھد کنگ ءَ اِنت، کہ ما اے چیز ءَ ھچ بر نہ منّ ایں۔
آئی ءَ گْوشتگ کہ این ڈی پی ھمے سرپد بیت کہ ڈاکٹر بھار شاہ ءِ دزگیر کنگ ءُ آئی ءِ بگیری ءَ وتگڑیں ایپ آئی آر نبشتہ کنگ ءِ مول ءُ مُراد ھمیش اِنت کہ جاندُراھی بھرگ ءِ جیڑھانی بابت ءَ آ نادلگوش بہ بنت ءُ ھچ مہ گْوش اَنت۔ انیگیں روچ ءَ سرکار ءَ آمیدگس ءِ کمک ءَ جاندُراھی بھرگ ءُ زانشتی بھرگ ءِ بابت ءَ گپ جنگ ءِ سر ءَ پابندی جتگ، کہ اے راجمستری راھبندانی بگیری اِنت۔ چہ ایشی ءَ ابید ڈاکٹر ءُ آدگہ کارمند بیھار دیگ ءِ تُرسینگ بیگ ءَ اَنت کہ اے درکانودی گامگیجے، کہ بلوچستان ءِ مردمانی بنکی ھکانی سر ءَ اُرش کنگ اِنت۔
آئی ءَ گْوشتگ کہ این ڈی پی ھمے لوٹ ایت کہ گرینڈ ھیلتھ الائنس ءِ سرکماش ڈاکٹر بھار شاہ گوں ھمراھاں زوت یل کنگ ءُ آئی ءِ بگیری ءَ نبشتہ کنگ بیتگیں وتگڑیں ایپ آئی آر ھلاس کنگ بہ بیت۔سرکار بایدیں جاندُراھی بھرگ ءِ جیڑھانی گیش ءِ گیوار بہ کنت ءُ کارمندانی ھکی ئیں لوٹاں بہ منّ ایت ءُ پہ آیانی سرجم کنگ ءَ گامگیج بہ زور ایت، آیانی دپ ءِ بند کنگ ءِ جُھد ءَ مہ کنت۔
آئی ءَ گْوشتگ کہ ما تچکی ءَ گْوش ایں اگاں ڈاکٹر بھار شاہ گوں ھمراھاں زوت یل کنگ مہ بیت گڑا گرینڈ ھیلتھ الائنس ءِ نیمگ ءَ ھرچ پیسلھے کنگ بہ بیت،این ڈی پی آئی ءِ پلہ مرزی ءَ کنت۔ بلوچستان ءِ مردم ءُ کارمندانی ھکانی پھریزگ ءَ این ڈی پی ھرچ کجا توار چست کنت۔
