شال: پہ زور بیگواھیں مردمانی پد جنگ ءَ وی بی ایم پی ءِ شدکشیں زھرشانی گدان ءَ شال پریس کلب ءِ دیم ءَ 5698 روچ سرجم بیتگ۔ دوشمبے ءِ روچ ءَ بی ایس او پجار ءِ کمک سرکماش داکٹر تارک، بنجاھی کارگشاد ابرار برکت ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماماکدیر گوں مردماں تران کرتگ ءُ گوشتگ کہ اے دراجکشیں زھرشانی ءَ ابید بلوچستان ءَ زوریں بیگواھیانی درچ برجاہ اِنت۔ ھمک روچ مردم آوار جنگ ءُ بیگواہ کنگ بوگ ءَ اَنت۔ زوریں بیگواھیانی درچ نوں بند کنگ لوٹ ایت چی ءَ کہ اے یک مردمے ءِ جیڑہ نہ اِنت بلکیں مچی سزا ءِ گنتریں دروشم اِنت۔
