نیشنل ڈیموکریٹک پارٹی کیچ ھنکین ءَ ماں رسانکدر ءَ وتی شنگ کرتگیں درشانے ءَ گوشتگ کہ گوستگیں شپ ءَ پاکستانی لشکر ءَ چہ کیچ ءِ جتا جتائیں ھنداں شش مردم آوار جتگ ءُ بیگواہ کرتگ کہ چہ ایشی ءَ مردم ترس ءِ آماچ اَنت۔ مردمانی زوربیگواہ کنگ مچی سزا ءِ بھر اِنت ءُ آئی ءِ سوب ءَ بیگواھیں مردمانی جند ءَ ھوار آیانی کھول ھم سسائی ءُ جانی تاوان ءِ دیمپان اَنت۔ چہ ریاست ءِ نیمگ ءَ چوشیں کاروائی بس مردمانی دل ءَ پہ آئی ءَ کست ءُ کینگ ودی کنت۔
آئی ءَ گوشتگ کہ دوشی پاکستانی لشکر ءَ آپسر بنڈ بازار ءَ بیڑ برتگ ءُ شازیب بلوچ ء اللہ داد ، شیرجان ءُ پاروک ء اسھاک آوار جنگ ءَ پد بیگواہ کرتگ اَنت ۔ چوش کہ شیرجان ءُ پاروک ءِ برات شمس پیسر ءَ پاکستانی لشکر ءَ آوار جتگ اَت ءُ انگت ءَ ھم بیگواہ اِنت ءُ انوں آئی ءِ دو برات آوار جنگ بیتگ۔
این ڈی پی ءِ گوشگ اِنت کہ ھمے وڑ ءَ پاکستانی لشکر ءَ چہ شاھی تمپ ءَ شاھجان شاھی ء بشام ءُ شگراللہ ء مھمد الی چہ گس ءَ آوار جتگ ءُ بیگواہ کرتگ اَنت۔ آیانی آوار جنگ ءِ بابت ءَآیانی کھولاں ھچ وڑیں سرپدی دیگ نہ بیتگ کہ ما چہ اِے گپ ءَ سک پریشان اِیں۔
آئی ءَ گوشتگ کہ ھمے وڑ ءَ چہ مند ءَ نادرا ءِ کارکن رمزان ء جان مھمد آوار جنگ بیتگ۔ رمزان ءِ کھول ءَ آئی ءِ زوربیگواھی ءِ بگیری ءَ آئی ءِ بُنُکی ھند ھیرونک ءَ زھرشانی کرتگ ءُ رمزان ءِ یل کنگ ءِ لوٹ کرتگ۔
این ڈی پی ءَ گوشتگ کہ گوں اِے زوربیگواھی کیسانی گندگ ءَ مارا ھمے گمان بیت کہ انگت دگہ چوشیں بازیں کیس ھست کہ دیم ءَ نیاتکگ اَنت۔ بلوچستان ءَ زوربیگواھی ءِ گیش بوگ تچک ءَ انسانی ھکانی پادمال کنگ ءُ ریاست ءِ شوربندی اِنت کہ اِے پہ سرکار ءَ مزنیں بژنی گپے ۔ ما چہ ریاست ءِ نیمگ ءَ ورناھانی زوربیگواھی ءَ ایر جن اِیں ءُ آئی ءِ بند کنگ ءِ لوٹ ءَ کن اِیں چے ءَ کہ اِے کار ادارھانی بگیری ءَ اِنت۔
