بلوچ یکجھتی کمیٹی ءَ ڈاکٹر مھرنگ ءِ سروکی ءَ دشت ءَ بے وارسانی مانشجاہ ءَ پریس کانپرنس کُرتگ ءُ گْوشتگ کہ مرچی اے مانشجاہ ءَ پریس کانپرنس کنگ ءِ مول ءُ مُراد جھان ءِ سرپد کنگ اِنت کہ مرچی بلوچ راج ریاست ءِ بدتریں زوراکیانی دیمپان اِنت۔ اے مانشجاہ ھمے زوراکیانی گواہ اِنت کہ مرچی بلوچ ءِ گون ءَ چے کنگ بیگ ءَ اِنت۔ اِد ءَ سدانی کچ ءَ کل کنگ بیتگیں بلوچ پُسگ پاکستانی ریاست ءَ نام ءُ نشان زانتگ اَنت ءُ چہ گس،کھول ءُ مردمانی دیم ءَ آوار جتگ اَنت۔داں مُدتے ءَ آزار داتگ ءُ پد ءَ کُشتگ اَنت۔ ریاست ءِ زوراکی ھما جاہ ءَ سر بیتگ کہ اے ورنا چہ کھول ءِ دیم ءَ پجارگ ءُ آوار جنگ بیتگ اَنت بلے ھنچوش آزار داتگ اَنت کہ کھولاں وتی مردم پجاہ نیارتگ اَنت۔ مرچی اے بلوچ پُسگ بے پجار ءَ ھمے مانشجاہ ءَ کَل اَنت۔بلوچستان ءِ ھمک شھر ءُ میتگانی مانشجاھاں چوشیں مانش باز اِنت کہ بے پجار ءَ کل اَنت۔
آئی ءَ گْوشتگ کہ ما ھمے سرپد بیں کہ پاکستانی ریاست بلوچ پُسگاں پجارگ ءُ گچین کنگ ءُ کُشگ ءَ اِنت،آیاں پد ءَ بےوارس کنگ ءُ کل کنگ ءَ اِنت، زھگاں بگر داں کماشاں دُرساں جانی ءُ سَسّائی زوراکی ءِ نشانگ کنگ ءَ اِنت۔اے دُرس یک شوربندی یے ءِ بھر اَنت۔آئی ءِ مول ءُ مُراد بلوچ راج ءِ ھلاس کنگ اِنت۔اے کار میان استمان ءِ کانودانی رد ءَ تچکی ءَ ”بلوچ چکچینی” گْوشگ بیت۔
آئی ءَ گْوشتگ کہ پاری روانک ءِ میان ءَ بلوچ یکجھتی کمیٹی ءَ 25 جنوری "بلوچ چکچینی ءِ یاتگاری روچ” ءِ بنیاد ءَ برجم دارگ ءِ جار جتگ اَت۔اے روچ ءِ مول ءُ مراد ھما دُرسیں مردمانی گیرآرگ اِنت کہ بلوچ چکچینی شوندات ءِ بنیاد ءَ کُشگ بیتگ اَنت، جانی ءُ سَسّائی آزار داتگ اَنت، گوں آیانی کھولاں ھمدردی ءِ درشان کنگ اِنت۔ایشی ءِ ھواری ءَ اے روچ ءَ جھان ءَ بیسہ دیگی اِنت کہ ھمے وڑ ءَ کہ آدگہ ایردستیں راجانی چُکچینی میان استمان ءَ منّگ بیتگ،ھمے وڑ ءَ بلوچ راج ءِ سر ءَ کہ ھرچی زوراکی بیگ ءَ اِنت میان استمان ءَ منّگ بہ بیت۔ بلوچ چکچینی زوت گِر ءُ دار بوت نہ کنت داں کہ بلوچ راج پھریزگ مہ بیت۔
آئی ءَ گْوشتگ کہ 5 جنوری 2025 ءَ بلوچ یکجھتی کمیٹی ءِ چارمی بنجاھی پتر ءِ دیوان برجم دارگ بیتگ ءُ شور کنگ بیتگ کہ 25 جنوری "بلوچ چکچینی ءِ یاتگاری روچ” ءِ نام ءَ برجم دارگ بیت۔اے درگت ءَ دالبندین ءَ یک راجی مچی یے ھم برجم دارگ بیت۔اے روچ ءِ درگت ءَ بلوچ چکچینی ءِ بابت ءَ جھان ءِ سرپد کنگ ءَ جتائیں دامگی مراگش برجم دارگ بیت، پہ سرپدی دیگ ءَ کتابُک ءُ پنتاک ھم شنگ کنگ بیت۔
آئی ءَ گْوشتگ کہ اے روچ 25 جنوری 2014 ءِ دردناکیں وئیل ءِ یات ءَ پِرین ایت،وھدے توتک ءَ پاکستانی چیریں دارھانی جوڑ کُرتگیں کشندہ ٹولی ءِ یل داتگیں”بلوچ کش بنجل” ءَ سد ءَ گیش زوربیگواھیں مردمانی لاش دزکپتگ اَت۔اے دلپدردیں وئیل پہ بلوچ راج ءِ راجی یاداشت ءَ یک ٹوھیں ٹپے جوڑ بیتگ،کہ مرچی ھم ھرچ بلوچ کھول، مات،گھار،پِت ءُ کودکیں زھگ پدرد اَنت۔ توتک ءِ مُچی مانش ھمے وئیل ءِ چیدگ اَنت ءُ داں مرچی ھم کھول پہ وتی مردمانی پجارگ ءِ انساپ ءَ سرسران اَنت۔ھمے سْوب اِنت کہ بلوچ یکجھتی کمیٹی ءَ "بلوچ چکچینی ءِ یاتگاری روچ” ءَ 25 جنوری گچین کُرتگ۔
آئی ءَ گْوشتگ کہ مرچی ما پریس کانپرنس ءِ پارست ءَ بلوچستان ءَ ھوار گوں سرجمیں جھان ءَ نشتگیں بلوچاں دزبندی کن ایں کہ آ 25 جنوری ءِ یاتگاری روچ ءِ تیاری ءَ بہ کن اَنت۔بلوچ راج ھمک مردم بایدیں وتی کُنش ءَ اے روچ ءِ تیاری ءَ بہ کنت ءُ اے جُھد ءَ گوں بلوچ یکجھتی کمیٹی ءَ ھمکوپگ بہ بیت۔
آئی ءَ گْوشتگ کہ بلوچ یکجھتی کمیٹی ءِ دُرسیں ھنکین 25 جنوری ءَ دالبندین ءَ راجی مُچی ءِ تیاری ءَ بہ کن اَنت۔ بلوچستان ءِ ھمک شھر ءُ میتگانی مردم سرپد کنگ بہ بنت،بلوچ چکچینی ءَ مردمانی نامانی یکجاہ کنگ ءَ گدان جنگ بہ بیت ءُ چکچینی ءِ آماچیں مردم ءُ کھولانی گون ءَ رھوت کنگ بیت۔اے روچ نہ ایوک ءَ بلوچ راج ءِ جُھد کنگ ءِ کول اِنت بلکیں سرجمیں جھان ءِ مردمانی زِرد ءِ ٹوھینگ ءِ وھد اِنت، داں کہ میان استمان بلوچ چکچینی ءَ بہ منّ ایت ءُ پہ ایشی ءِ ھلاس کنگ ءَ گامگیج بہ زور ایت۔
