بلوچ وومن پورم ءِ سروک ڈاکٹر شلی ءَ ماں رسانکدر ءَ وتی درشان ءَ گوشتگ کہ ھوشاپ ءَ دگہ یک مردمے ءِ زور بیگواھی ءُ مردمانی زھرشانی دیست دلپدرد بوتاں، چے ءَ رمزان جھمنند ھیرونک ھپت جنوری ءَ چہ مند ءَ پاکستانی لشکر ءَ آوار جتگ۔ آ نادرا ءَ یک پروجیکٹے ءِ سر ءَ کار ءَ بیتگ۔
آئی ءَ گْوشتگ کہ بلوچستان ءِ مردم چہ زوربیگواھیاں تکانسُر ءُ جنجالانی دیمپان اَنت۔ ھمک دومی روچ ءَ ما گندگ ءَ ایں کہ چہ یک دمگے ءَ بلوچے بیگواہ کنگ بیتگ کہ باز بژنی گپے۔
آئی ءَ گْوشتگ کہ من ھیرونک ءُ گوں کش ءُ گْور ءِ مردماں دزبندی کناں کہ زھرشانی ءَ ھوار بہ بنت چے ءَ کہ مارا داں آوار جنوکاں وتی گپ سر کنگی اِنت کہ نوں ما چِد ءُ گیش وتی مردمانی زور بیگواھیاں اوپار کُرت نہ کن ایں۔
