ھب: پاکستانی لشکر ءِ دست ءَ زوربیگواہ کرتگیں یاسر ءُ جنید ءِ گھار یاسمین ھمید ءَ سَے روچ ءِ شدکشیں زھرشانی ءَ نندگ ءِ جار جتگ۔
یاسر ءُ جنید ءِ گھار یاسمین ھمید ءَ چاگردی رسانکدر ایکس ءَ وتی تامربندے شنگ کرتگ ءُ گوشتگ منی براتاں سے ماہ اِنت کہ زوربیگواھ اَنت
آئی گوشتگ کہ 8 اکتوبر 2024 ءِ شپ ءِ ادار دہ ءَ چیریں ادارھانی کارمنداں جنید ھمید چہ ھب بوانی ءِ شاہ پمپ ءَ آوار جتگ ءُ برتگ۔ یاسر ھمید ءَ چہ کلات ءَ پاکستانی لشکر ءَ آوار جتگ۔
آئی گوشتگ کہ من پہ وتی براتانی آجوئی ءَ 10 جنوری ءَ لسبیلہ پریس کلب ءِ دیم ءَ سَے روچی زھرشانی گدانے جن ایں ءُ شدکشیں زھرشانی ءَ نندیں 12 جنوری ءَ یک شمبے ءِ ادارہ دو ءَ زھرشانی کن ایں۔
آئی گوں درسیں بھرگاں سیادی داروکیں مردماں زھرشانی گدان ءَ بھر زورگ ءِ لوٹ کرتگ ءُ چہ انسانی ھکانی ادارھاں پہ یاسر ءُ جنید ءِ آجوئی گامگیج زورگ ءِ لوٹ کرتگ۔
