ھوشاپ: زمان جان ءُ ابولھسن ءِ زوریں بیگواھی ءَ پد دروگیں کیس جنگ ءِ بگیری ءَ کھول ءِ نیمگ ءَ برجاھیں زھرشانی نندانکءَ شمبے ءِ روچ ءَ مراگشے برجم دارگ بیتگ۔ مراگش ءَ سیاسی ءُ چاگردی کارکناں ھوار کِر ءُ کشانی مردماں بازیں کچے ءَ بھر زرتگ۔
آیاں تران کرتگ ءُ گوشتگ کہ زمان جان ءُ ابولھسن ءِ میار ھمے بوتگ کہ آ چہ ھمے دمک ءَ گوزگ ءَ بیتگ اَنت، آ گسءَ لوٹائینگ ءُ ادارھانی دست ءَ دیگ ءُ بیگواہ کنگ بنت آیانی سر ءَ دروگیں کیس جنگ بیتگ۔ زمان جان ءُ ابولھسن بلوچءِ بنداتی زور بیگواھیں مردم نہ اَنت ءُ گڈی ھم نہ بنت۔
آیاں گوشتگ کہ بلوچستان ءِ ھمک ھند ءُ دمگ ءِ ھمے ھال اِنت۔ مرچی اد ءَ ھم زوراکیانی بگیری ءَ زھرشانی برجاہ اِنت، مرچی تربتءَ ھم زھرشانی برجاہ اِنت، زی ڈی بلوچ ءَ بوتگ، مرچی سوراب ءَ ھم زھرشانی کنگ بیتگ۔ ھمک روچ بلوچستان جتائیں ھند ءُ دمگانی تہ ءَ زھرشانی ھست۔ کس بے گس نہ اِنت ءُ پہ دگہ نپے ءَ اے سارتی ءِ سر ءَ نہ نشتگ بلکیں اے مردمانءَ لاچاری ءَ ھمے جاہ ءَ آرتگ۔ اے زھرشانیانی مول ھمیش اِنت کہ اے مردمانی توار داں ھما ادارھاں سر بہ بیت ءُ ادارہ آیانی مردماں یل بہ کنت۔
آیاں گوشتگ کہ اے زوریں بیگواھی درسیں بلوچانی جیڑہ اِنت، مرچی ما ھمیشی ءِآماچیں باندا دگہ کسے ھم ھمے زوراکی ءِ آماچ بیت۔ گڑا باید اِنت کہ ھمک بلوچ چوشیں گرانیں ساھتاں وتی مردمانی ھمراھداری ءَ بہ کن اَنت۔
