گوادر: بولان کریم جھمنند پسنی 4 جنوری 2013 ءَ پاکستانی لشکر ءَ آوار جتگ ءِ بیگواہ کُرتگ کہ انگت بیگواہ اِنت۔ 4 جنوری 2025 ءَ بولان کریم ءِ بیگواھی ءَ 12 سال سرجم بیت۔
اے درگت ءَ چہ آئی ءِ کھول ءِ نیمگ ءَ پسنی پریس کلب داں شال ھوٹل ءَ روانکے کشگ بیت، کھول ءَ چہ پسنی ءِ دُرسیں مردماں دزبندی کُرتگ کہ گیشاں چہ گیش روانک ءَ بھر بہ زور اِت ءُ گوں ما ھمتوار بہ اِت۔روانک 4جنوری ءَ بیگاہ ءِ چار ءَ برجم دار بیت۔
بولان کریم ءِ زوربیگواھی ءِ بگیری ءُ پہ آئی ءِ آجوئی ءَ کھول ءِ نیمگ ءَ ‘X’ ( ٹویٹر – Tweeter) ءَ یک کیمپینے ھم برجم دارگ بیت۔کھول ءَ چہ سیاسی ءُ چاگردی کارکناں ھوار چہ لس مردماں دزبندی کُرتگ کہ کیمپئن ءَ بھر بہ زور اِت ءُ مئے توار ءَ داں جھان ءَ سر کنگ ءَ مئے گون ءَ ھمتوار بہ بہ اِت۔کیمپئن 4 جنوری ءِ بیگاہ ءِ شش ءَ داں شپ ءِ دوازدہ ءَ برجم دارگ بیت۔
