بلوچستان لبریشن پرنٹءِ جارکش میجر گھرامءَ پاری ئیں کارانی رپورٹ ماں رسانکدر ءَ شنگ کرتگ ءُ گوشتگ کہ بی ایل ایپ ءِ سرمچاراں 2024 ءَ سرجمیں بلوچستان ءَ 284 ارش کرتگ، ارشاں پاکستانی لشکر، دژمنیں لشکر ءِ کمکار، بند ساچی شرکت ءُ لشکری شوربندی نشانگ کرتگ اَنت۔
آئی ءَ گوشتگ کہ 24 اسنائپر ارش کرتگ، 32 ارش ءَ سنگر گپتگ ءُ زورگریں پاکستانی لشکر نشانگ کرتگ، 23 دستی بمب ارشاں ھوار دہ بمب ارش کرتگ۔ دگہ 195 ارش ءَ لشکری بنجل ءُ چوکیاں ھوار دژمن ءِ کمکار ءُلشکری شوربندی نشانگ کرتگ اَنت۔
جارکش ءَ گوشتگ کہ ارشانی آسر ءَ280 لشکری کارمند مرتگ ءُ167ٹپی بوتگ۔ ارشاں 36 دژمن ءِکمکار کشتگ ءُ باز ٹپی بوتگ۔ ارشانی میان ءَ دو ایپ سی کارمندا ں ھوار چاردہ ءَ گیش دژمنیں کارمند دزگیر کرتگ۔ جتائیں جاھاں دژمنیں لشکر ءُدژمن ءِ کمکارانی سر ءَ ارشاں 34 ءَ گیش سلاہ دستیگ کرتگ۔
آئی ءَ گوشتگ کہ ارشاں دژمنیں لشکر ءِ ھشت گاڑی سرجم ءَ تباہ بیتگ، دگہ باز لشکری گاڑی ءُپرپٹ چہ ترندیں ارشانی زد ءَآھگ ءَ تاوان بوتگ، دژمنءِ چار سرویلنس ڈرون کیمرہ جنگ ءُدور دیگ بوتگ، جتائیں جاھاں جتگیں کمیرہ تباہ کرتگ اَنت۔
جارکشءَ گوشتگ کہ ارشاں دگہ پنچ ٹرک، سے بلڈوزر، سے ٹرالر، یک ٹریکٹرے ءُ دو ڈمپراں ھوار یک ٹینکرے مانداشتگ سرجم ءَ تباہ بوتگ۔ پنچ ٹریلر تیرگواری کرتگ ءُ تاوان داتگ، چاردہ ٹرک تیرگواری کرتگ ءُ تاوان داتگ۔ آدگہ ایپ ڈبلیو او ءِ ڈمپر، لوڈر ءُ آدگہ مشین ءُ ساماناں ھوار 27 گاڑی تیرگواری کرتگءُ تاوان داتگ۔ نوزدہ موبائل ٹاور گوں مشینءُ ساماناں مانداشتگ ءُ تباہ کرتگ۔ کریش پلانٹ ءَھوار بند ساچی سائٹ مانداشتگ۔
میجر گھرام ءَ گوشتگ کہ پہ ماتیں سرڈگار ءِ دیمپانی ءَ بی ایل ایپ ءِ 16 جنگولیں سرمچاراں وتی جان ءِ دیمونی داتگ ءُشھید بوتگ اَنت۔ اے نہ ترسیں راجی شھیداں پہ وتی سرڈگار ءِآجوئی، دژمنیں لشکر ءِ سرجم ءَ درآھگ ءُ پہ آجوئی جھد ءَ وتی جان ندر کرتگ اَنت ءُھمے پیش داشتگ کہ پہ سرڈگار ءِ دیمپانی ھرپیمیں دیمونی دیگ ءَ چک ءُ پد نہ بہ ایں۔ آیانی دیمونی نہ تیوک ءَ مئے گوستانک ءِ تہ ءَ بے مٹ اَنت بلکیں پہ آھوکیں پدریچاں مادنیں راہ اَنت۔ ھمے شھیدانی دیمونی مدام گیر آرگ بنت ءُ آیانی راہ ءَ رھادگ بہ این ءُ سرڈگار ءِ دیمپانی ءَ گیش مھکم کن ایں۔
