کیچ:زوربیگواھیں زمان جان ءُ ابولھسن ءِ کھول ءَ پریس کانپرینس کُرتگ ءُ گْوشتگ کہ سی ٹی ڈی دروگ بندیت، نہ مئے مردم چہ کلہ ابداللہ ءَ دزگیر کنگ بیتگ اَنت ءُ نہ کہ آ گوں سلاہ بندیں گلے ءَ بندوک اَنت۔راستی ھمیش اِنت کہ مئے مردم کیچ دمگ ءِ چیئرمین اوتمان ءَ 16 دسمبر 2024 ءَ لوٹائینتگ اَنت ءُ پد ءَ پاکستانی لشکر ءِ دست ءَ داتگ اَنت۔
آئی گْوشتگ کہ اے ساپیں دروگے کہ زمان ءُ ابولھسن چہ اوگانستان ءَ سلاہ آؤرتگ۔مارا گوں اے وڑیں ھچ کاراں کار نیست ءُ اے دُرسیں بُھتام وتگڑین ءُ دروگین اَنت۔
آئی گْوشتگ کہ مئے کھول بُنی تاں سر پاکستانی لشکر ءِ زوراکیانی آماچ اِنت،بلے ما ھچبر ھچ نہ گْوشتگ ءُ مدام چہ ریاست ءِ ادارھاں انساپ ءِ تلبگار بوتگیں۔
آئی ءَ گْوشتگ کہ داں مئے مردم یل کنگ مہ بنت ما ھوشاپ ءَ زھرشانی کن ایں ءُ دگ ءَ بند کن ایں۔مئے لوٹ ھمیش اِنت کہ کیچ دمگ ءِ چیئرمین ھوتمان ءُ آئی ءِ ھمراھاں ایپ آئی آر کنگ بہ بنت کہ آیاں ناھک ءَ زمان ءُ ابولھسن زور بیگواہ کنائینتگ اَنت۔ مئے کھول کہ مدام زوراکیانی دیمپان اِنت، اے ناھکی بند کنگ بہ بیت۔مُپت ناھک ءَ ما جانی ءُ سَسّائی زوراکیانی آماچ کنگ بیگ ءَ اِنت، اے بابت ءِ مارا سدکی دیگ بہ بیت کہ کشندہ ٹولی ءُ ریاست ءِ ادارھانی نیمگ ءَ چِد ءُ پد اے وڑ کنگ نہ بیت۔ کہ مدام ریاستی ادارہ ءُ کشندہ ٹولی ءِ کارمند مارا بیھار دیگ ءُ تُرسینگ ءِ جُھد ءَ کنگ ءَ اَنت۔
