بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ رسانکدر، پاکستان سرکار ءُ واکدار دلگوش داتگ اَنت ءُ گوشتگ کہ بلوچ چکچینی ءِ بگیری ءَ در آتکگیں روانک ءَ چہ بنداتی روچاں پاکستان ءِ وتگڑیں رسانکدر رپورٹ کنگ ءَ نہ اِنت۔ تیوک ءَ لھتیں اھوالکاراں وتی اھوالکاری ءِ پرز پیلو کرتگ ءُ مئے روانک رپورٹ کرتگ۔ بلے انوں آ تچکی آزار دیگ، ترسینگ ءُ بیھارانی دیمپان کنگ بوتگ اَنت۔اھوالکار سمیہ ھپیز، پاتمہ رزاک، مھمد اسمان، مھراب ھالد، ھامد میر، اسد تور ءُ آدگہ اھوالکار تچکی ءَ آزار، دزگیری ءُ زوراکیانی دیمپان کنگ بوتگ اَنت ءُ پہ آیانی زندگی ءَ سکا ترس اِنت۔ اھوالکارانی توار ءِ دارگ ھک ءُ راستی ءِ توار ءِ دارگ زانگ بیت ءُ اھوالکارانی گون ءَ زوراکی کنگ کانود ءِ ھساب ءَ میارباری یے۔ ما اھوالکارانی آزار دیگ ءُ آیانی گون ءَ زوراکیاں گوں ترندیں دانکاں ایر جن ایں ءُ پاکستان ءَ ھوار اھوالکارانی بارو ءَ گوں میان استمان ءَ لوٹ کن ایں کہ اے زوراکیانی بگیری ءَ توار چست بہ کن اَنت ءُ پہ اے اھوالکارانی پھریزگ ءَ گامگیج بزور اَنت۔
آئی گوشتگ کہ یک نیمگے ءَ بلوچ چکچینی ءِ بگیری ءَ برجاھیں روانگ ءِ بارو ءَ پاکستان ءِ وتگڑیں رسانکدر ءَ چہ بنداتی روچاں پابندی برجاہ اِنت۔ آ اے زرمبشت ءَ پہ زانت رپورٹ کنگ ءَ نہ اَنت ءُ دومی نیمگ ءَ ریاستی ادارہ مئے پرایمنیں روانک ءَ رسانکدر ءِ دارگ اِش بندات کرتگ، ایشی ءِ تہ ءَ بس لھتیں اھوالکار رسانکدر ءَ رپورٹ کنگ ءَ جوانیں کردے پیلو کنگ ءَ اَنت۔ آیانی مول مئے پرایمنیں روانک ءِ شکی کنگ ءُ روانک ءَ ھواریں مردمانی جزباتی کنگ اِنت۔ ھمے رسانکدر ءِ پابندی ءِ پارست ءَ ریاست بلوچ چکچینی ءِ بگیری ءَ برجاھیں توار ءَ دارگ ءُ اے بارو ءَ مئے جھگیری ءَ وتی گپانی گون ءَ کنگ لوٹ ایت۔ اے نہ تیوک ءَ بلوچ بلکیں تیوگیں ڈیھ ءِ نزورینانی توار ءِ دارگ ءِ مھکمیں پندل اِنت۔ گشیتریں اھوالکارانی مول اے روانک ءِ بارو ءَ مھلوک ءُ میان استمانی تک ءِ رد دیگ ءِ اِنت، اے کار اھوالکار ءُ اھوالکاری راھبند ءِ بگیری اِنت۔
درشان ءِ گُڈی ءَ جارکش ءَ گوشتگ کہ ما پاکستان ءَ ھوار تیوگیں جھان ءِ اھوالکار ءُ اھوالکاری انجمنانی گون ءَ لوٹ کن ایں کہ آ اے لیکہ ءِ سر ءَ وتی کرد ءَ جوانیں وڑے ءَ پیلو بہ کن اَنت ءُ اھوالکاری لوٹ ءُ راھبند ءَ زندگ بدار اَنت۔ ابید رندگیری کنوکیں اھوالکاری ءِ پرز پیلو کنگ ءَ گامگیج بزور اَنت۔ مئے پرایمنیں روانک ءِ بارو ءَ رسانکدر نادلگوش اِنت ءُ رسانکدر ءِ پابندی ءِ سر ءَ دلگوش گور کنگ بہ بیت۔
