بلوچ یکجھتی کمیٹی کراچی ھنکین ءَ ماں رسانکدر ءَ وتی شنگ کرتگیں درشانے ءَ گوشتگ کہ ھب پولیس ءَ زھرشانی ءَ نشتگیں مردمانی سر ءَ بیڑ برتگ زوراکی کرتگ ءُ بی وائی سی کراچی ھنکین ءِ جھدکار جمال بلوچ آوار جتگ ءُ بیگواہ کرتگ۔
آئی گوشتگ کہ ما پُرایمن بوتگیں انچش کہ ما وتی روانک ءَ کشگ ءَ بوتگیں، پولیس ءَ مئے زھگ ءُ زالبول ءُ مردینانی سر ءَ زوراکی بندات کرتگ ءُ مئے زھرشانی روانک ءِ دارگ ءَ ھر وڑیں جھد کرتگ۔
آئی گوشتگ کہ مئے زھرشانی نندانک انگت بوانی چاراہ ءَ برجاہ اِنت۔ ما بلوچ راج ءَ ھوار گوں درسیں بھرگاں سیادی داروکیں مردماں زھرشانی ءَ بھر زورگ ءِ لوٹ ءَ کن ایں کہ آیانی ھمراہ بوگ مئے توکل اِنت۔ اے زوراکی ءِ گڈی ھد اِنت کہ ما وتی راھبندی ھک کارمرز کنگ ءُ زھرشانی روانک کش اِت نہ کن ایں۔ انچوش کہ تھاری گیش بُوْان اِنت مئے سر ءَ گیش زوراکی کنگ ءِ گمان بوگ ءَ اِنت۔
آئی گوشتگ کہ زھرشانی ءِ جاہ ءَ ساڑی ایں مئے یک جھد کارے ءَ تاوانے بوت آئی زمہ وار ریاست ءُ آئی ادارہ اَنت۔ ما پیسر ءَ گوشتگ کہ ما پُرایمن نشتگ ایں۔ زور ءِ کارمرز کنگ ءَ پھریز بہ کن اِت ءُ مارا پہ وتی ھکاں توار چست کنگ ءَ بِل اِت۔ما ایمن بوتگیں ءُ ایمن بہ ایں ریاست ءُ آئی ادارہ ھوش بہ کن اَنت۔ مئے راج گوں وتی مردماں اوشتاتگ ءُ ھک ءُ راست ءِ گپ ءَ کنت۔
