ھب چوکی: زوربیگواھیں اھوالکار زبیر بلوچ ءِ کھول ءَ گوں بلوچ یکجھتی کمیٹی ھب زون ءَ ھوار ھب چوکی ءَ پریس کانپرنس کرتگ ءُ گوشتگ زبیر بلوچ ء التاپ تجابان ءِ جھمنند اِنت ءُ آئی ءَ بلوچستان زانشتجاه ءِ پولیٹیکل سائنس ونتگ ءُ اھولکارے بیتگ. وھدیکه آ وتی گس ءَ اتکگ گڑا سلاه بندیں مردماں چه گس ءَ آوار جتگ.
کھول ءَ گوشتگ انچش که ما بلوچستان ءِ جتائیں جاھاں چه سرکار ءِ نیمگ ءَ بلوچانی زوربیگواھی ءُ درکانودی کوش ءَ گندگ ءَ اِیں مارا انچش سما بوگ ءَ اِنت که زبیر ءِ زوربیگواه کنگ ھم چه ریاست ءِ نیمگ ءَ ھمے مچی سزا ءِ درچ اِنت.
کھول ءَ دیمتر ءَ گوشتگ که بلوچستان ءَ زوربیگواھی ءِ درچ گیش بوگ ءَ اِنت ءُ چه ھمے بنیاد ءَ مارا ترسگ ءَ اِنت که زبیر ءَ جانی تاوان مه دے اَنت. چوش هم نه اِنت که سرکار یک نیمگے مئے زھگ ءَ زوربیگواه به کنت ءُ آزار به دنت ءُ ما بے تواری ءَ به نند اِیں مئے لوٹ پدّر اِنت ما زبیر ءِ زوت یل کنگ ءُ آجوئی ءِ لوٹ ءَ کن اِیں.
کھول ءَ گوشتگ که ما ھب چوکی ءَ بوانی بائی پاس چاراه ءَ زھرشانی کنگ ءَ اِیں. مئے زھرشانی داں ھما وھد ءَ که سرکار مئے لوٹاں پورو نه کنت برجاه اِنت. ما سرکار ءَ سے روچ وھد دے اِیں که زبیر ءَ یل به کنت اگاں ناں گڑا ما وتی زھرشانی ءَ گیشتر کن اِیں.
کھول ءَ گوں بلوچ راج ءَ لوٹ کرتگ ءُ گوشتگ که زوربیگواھی یک کھولے ءِ ناں بلکیں سرجمیں راجے ءِ جیڑه اِنت اگاں مرچی ما بے توار به به اِیں ءُ توار چست مه کن اِیں گڑا بیت کنت که باندا مئے وتی پتے ، براتے یا زھگے زوربیگواه کنگ به بیت مارا توار چست کنگی اِنت ءُ سرکار ءَ ھمے کلوه دیگی اِنت که ما آئی ءِ زلمانی بگیری ءَ بے توار نه بیں.
