شال: وی بی ایم پی ءِ سرکماش نسراللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ زوربیگواہ کرتگیں گل مھمد مری، امران مری، شیر مھمد مری ءُ سپر ھان مری ءِ کھول زھرشانی گدان ءَ آتکگ ءُ آیانی زوربیگواھی ءِ کیس گل ءِ کر ءَ یاداشت کرتگ۔
آئی گوشتگ کہ گل مھمد مری ءِ کھول ءِ گوشگ اِنت کہ گل مھمد مری ء گلام نبی ءَ ھمے ماہ ءِ بیست ءَ پاکستانی لشکر ءَ چہ ھرنائی ءَ ھما وھد ءَ آوار جتگ کہ آ جما ءِ نماز ءَ بازار ءَ شُتگ ءُ واتر برگو ءَ وتی گس ءَ روگ ءَ بوتگ۔
آئی گوشتگ کہ امران مری ءُ سپر ھان مری ءِ کھول ءَ گوشگ اِنت کہ امران مری ء مھمد نور ھرنائی سنڑلی ءِ جاہ منند انت ءُ سپرھان ء مھمد نور ھرنائی کوریاک ءِ جاہ منند انت۔ پاکستانی لشکر ءَ 30 نومبر ءَ چہ دکی ءِ شھر ءَ آوار جتگ اَنت۔
آئی گوشتگ کہ شیر مھمد مری ء مھمد نور ھم کوریاک ءِ جاہ منند اِنت۔ پاکستانی لشکر ھرنائی ءَ پیر ساھب چوکی ءِ کارمنداں آوار جتگ۔
نسراللہ ءَ گوشتگ کہ زوربیگواھیں مردمانی کھولاں گوشتگ کہ انتزامیہ مارا مئے مردمانی بابت ءَ ھچیں سرپدی دیگ ءَ نہ اِنت۔ ایشی سوب ءَ ما باز جنجالانی دیمپان ایں۔
نسراللہ ءَ گوشتگ کہ گل ءَ زوربیگواھیں مردمانی کھول دلجمی داتگ اَنت کہ گل مھمد مری، امران مری، سپر ھان مری اور شیر مھمد مری ءِ کیس آں سرکار ءُ پہ بیگواھیں مردماں جوڑ بوتگیں کمیشن ءَ سر کن۔ پہ آیانی آجوئی ءَ توار چست کنت
نسراللہ بلوچ ءَ چہ وتگڑیں سرکار ءَ لوٹ کرتگ کہ گل مھمد مری، امران مری، سپر ھان مری ءُ شیر مھمد مری ءِ سر ءَ چونیں بھتامے ھست آیاں آمیدگس ءَ پیش بہ کنت۔ اگاں آ بے میار اَنت زوت آیاں آجو بہ کنت ءُ آیانی کھول ءَ چہ اے جنجالاں بہ رکّین ایت۔
