کابل: اوگانستان ءِ دری کارانی وزیر امیرھان متکی ءَ پاکستان ءِ نیمگ ءَ پکتیکا ءَ اُرش گوں ترندیں دانکاں ایر جتگ ءُ گوشتگ کہ اوگان ءِ لس مھلوک وتی سرڈگار ءِ سر ءَ بیتگیں زوراکیاں کدی بے ھال نہ کنت۔
آئی ءَ اے گپ کابل ءَ سوویت یونین ءِ اوگانستان ءِ سر ءَ اُرش ءَ 45 سال سرجم بوگ ءِ یک مراگشے ءَ جتگ اَنت ءُ پاکستان ءَ زور داتگ ءُ گوشتگ کہ اوگانستان ءِ بابت ءَ زمہ وار ءُ شریں پالیسی جوڑ بہ کن۔
آئی ءَ گوشتگ کہ ما پاکستان سرکار ءَ ھمے کلوہ ءَ دے ایں کہ زھگانی شھید کنگ جوانیں کارے نہ اِنت۔ تو زھگ ءُ جنین نشانگ کرتگ اَنت، آیانی گس تباہ کرتگ اَنت۔ اے کار بھادری یے نہ اِنت لگوری یے۔
آئی ءَ دیمتر ءَ گوشتگ کہ پاکستان چہ انگریز، سوویت یونین ءُ نیٹو ءَ در بہ بارت، آیاں اوگانستان ءَ پروش وارتگ۔
اوگانستان ءِ دری کارانی وزیر ءَ ترانگ ءَ داتگ کہ دہ سال پیش اے مردم چہ وزیرستان ءَ لڈ ءُ بار کنگ ءَ لاچار بیتگ ءُ اوگانستان ءَ باھوٹ اَنت۔ جنین ءُ زھگانی کوش بھادری یے نہ اِنت۔ اگاں پاکستان، اوگانستان ءَ نزور سرپد بیت گڑا آئی ءَ چہ گوستانک ءَ در برگ لوٹ ایت۔
