بلوچ نیشنل موومنٹ ( بی این ایم ) ءِ انسانی ھکانی کارگشاد ڈاکٹر نازر نور ءَ ماں درشانے ءَ آواران ءَ زوربیگواه کنگ بیتگیں مردم ءِ آزار دیگ ءُ گوں بی ایل ایپ ءَ بندوک کنگ ایر جتگ ءُ گوشتگ زورگریں پاکستانی لشکر ءَ جون 2024 ءَ چه تیرتیج آواران ءَ دلجان ء الله بکش آوار جتگ ءُ بیگواه کرتگ اَت۔دلجان ءِ کھول ءَ آئی ءِ زوربیگواھی ءِ بگیری ءَ زھرشانی کُرتگ ءُ شھدگ بستگ اَت،گڑا کھول ءَ چه آواران ءِ انتزامیه ءِ نیمگ ءَ دلجمی دیگ بیتگ اَت کہ دلجان زوت دیم ءَ آرگ بیت گڑا کھول ءَ زھرشانی ھلاس کُرتگ اَت بلے دومی نیمگ ءَ پاکستانی ریاست ءَ وتی میار ءِ چیر دیگ ءَ دلجان گوں بی ایل ایپ ءَ بندوک کرتگ۔
آئی ءَ گوشتگ که دلجان پاکستانی لشکر ءِ بندیگ جاھاں بازیں آزار دیگ ءَ پد لاچار کنگ بیتگ کہ ماں تامربندے ءَ وت ءَ گوں بی ایل ایپ ءَ بندوک بہ کنت۔ پروش آماچیں لشکر بلوچ سلاه بندیں گلانی دیم ءَ په وتی پروش ءِ چیر دیگ ءَ رسانکدر ءَ کارمرز کنگ ءَ اِنت۔ اِے کار آئی ءِ سسائی ءُ زھنی پروش ءَ پدّر کنگ ءَ اِنت،گوں اے وڑیں کاراں آ بلوچ راجی جنز ءِ دیم ءَ وتی نزوری ءُ پروش ءَ منّگ ءَ اِنت۔
نازر نور ءَ گوشتگ ھمے وڑ ءَ اپریل 2024 ءَ چہ مشکے تنک ءَ زورگریں پاکستانی لشکر ءِ دست ءَ آوار جنگ بیتگیں ھاسل ء مھمدھسن لاچار کنگ بیتگ اَت کہ دروگیں تامربندے ءَ وت ءَ گوں بی ایل ایپ ءَ بندوک بہ کنت۔ چہ ایشی ءَ ھمے پدر بیت کہ پاکستان ءِ آزارجاھاں ورنا، کماش ءُ زھگ زوراکی ءِ نشانگ کنگ ءَ پد آیاں گوں آجوئیں لوٹوکیں سلاہ بندیں گلاں بندوک کنگ ءِ جُھد ءَ کنت داں کہ پنجاپ ءِ مردمانی ھمدردیاں گوں وت بہ کنت۔چونائی ءَ زورگریں پاکستانی ریاست بی ایل ایپ ءَ دیمروئی ءِ دژمن پدر کنگ ءُ آ وتی زورگری لُٹ ءُ پُل ءِ چیر دیگ ءِ جُھد ءَ کنگ ءَ اِنت بلے باسمائیں بلوچ راج زانت کہ گوں پاکستان ءَ آیانی رشتہ ایردست ءُ واجھی اِنت، مرچی چہ شھیدانی دیمونی ءُ سرمچارانی جُھداں بلوچ راج شر سرپد اِنت کہ زورگریں ریاست ھچبر زورگِپتیں دمگ ءُ اود ءِ مردماں دیمروئی نہ دنت بلکیں دیمروئی ءِ نام ءَ کارمرز کنت ءُ بس آیان ءَ ھر وڑیں زوراکی ءِ نشانگ کنت۔
نازر نور ءَ گوشتگ کہ اے گپ پدر اِنت کہ زورگر ءِ ادارہ ورنایاں دروگیں بُھتامانی منگ ءَ لاچار کنگ ءِ آیاں گوں بی ایل ایپ ءَ بندوک کنگ ءِ جُھد ءَ کنگ ءَ اِنت۔راجی آجوئی جُھد ءِ دیمروئی ءِ مردمانی ھمدردی ءُ وتی سرپد ءِ دیم ءِ دارگ ءِ جُھد پاکستانی ادارھانی بےسوبی ءَ پدر کنت۔اے اولی رند نہ اِنت بلکیں چہ سالاں درکانودی زور بیگواہ کنگ بیتگیں ورنایانی زوراکی ءِ نشانگ کنگ ءِ دْرچ برجاہ اِنت۔ انسانی ھکانی پدمالی ءُ آیانی گِر ءُ دار کنگ ءَ ادارھانی بے سوبی آیانی رُزوائی ءَ پدر کنگ اِنت۔
آئی ءَ گوشتگ کہ زورگریں لشکر ءُ لشکری ادارہ ایردستیں راجانی بےتوار کنگ ءَ ناروائیں راھاں کارمرز کنگ اِنت۔ میان استمانی انسانی ھکانی گل بائد اِنت پاکستان ءِ زوراکیانی بگیری ءَ گامگیج بزور اَنت ءُ بلوچستان ءَ زوربیگواھیانی گِر ءِ دار کنگ ءَ زوت گامگیج بہ زور اَنت۔
