
کیچ: بلوچ وومن پورم ءِ نیمگ ءَ شھید بانک کریمہ ءِ یات ءَ مراگشانی درچ ءَ زی کولواہ ءِ ھند بلور ءَ مراگشے برجم دارگ بیتگ۔ بلور ءِ کِر ءُ کشانی نزیکیں ھندانی مردماں بازیں کچے ءَ مراگش ءَ بھر زرتگ۔
چوش کہ اے بلوچ وومن پورم ءِ نیمگ ءَ شھید بانک کریمہ ءِ یات ءَ مراگشانی درچ ءِسیمی مراگش بیتگ، ایشی ءَبنداتی مراگش آواران ءِ ھند تیرتیج ءَ شھید بانک کریمہ ءِ سالروچ ءَبرجم دارگ بیتگ اَت ءُ دگہ یک مراگشے مالار کرک ءِ ڈل ءَ بیتگ۔
اے بابت ءَ بلوچ وومن پورم ءِ سروک ڈاکٹر شلی ءَ وتی شنگ کرتگیں تامربندے ءَ گوشتگ کہ شھید لمہ کریمہ ءِ یات ءَ باندا کولواہ ءِ ھند ڈنڈار ءَ مراگشے برجم دارگ بیت۔
آئی ءَ گوں ھندی مردماں دزبندی کرتگ ءُ گوشتگ کہ ڈنڈار ءِ کِر ءُ کشانی مردم باندا بیا اَنت ءُ مراگش ءَ بھر بزور اَنت ۔