بلوچستان لبریشن پرنٹ ءِ جارکش میجر گھرام ءَ ماں ررسانکدر ءَ وتی شنگ کرتگیں درشانے ءَ گوشتگ کہ بیست دسمبر ءِ سھب ءَ ھاران ءِ ھند سرھاران، ھرو ءَ زورگریں پاکستانی لشکر ءُ سرمچارانی میان ءَ میڑے ءَ دژمنیں لشکر ءِ یک میجرے ءَ ھوار نوہ کارمند مرتگ ءُ باز ٹپی بیتگ۔
آئی ءَ گوشتگ کہ پاکستانی لشکر ءِ دہ گاڑیانی کاروانے شپ ءِ گڈی پاس ءَ ھمے ھند ءَ پہ لشکرکشی ءِ نیت ءَ پترتگ ءُ سرمچارانی انگر کنگ ءِ جھد کرتگ، بلے بی ایل ایپ ءِ انٹیلیجنس ءِ ھال دیگ ءِبنیاد ءَآ پیسر ءَ جاڑیگ بیتگ اَنت۔ وھدے کہ لشکر ءَ سرمچارانی انگر کنگ ءِ جھد ءَ یک ترندیں میڑے داں چل ءُ پنچ دمان ءَ گیش برجاہ بیتگ۔ اے میڑ ءَ پاکستانی لشکر ءِ یک میجرے ءَ ھوار نوہ کارمند مرتگ ءُ باز ٹپی بیتگ۔
آئی ءَگوشتگ کہ سوبمندیں ارش ءَ پد سرمچاراں انگر پروشتگ ءُ پہ سلامتی مھکیں بندرءِ نیمگ ءَ شتگ اَنت۔
جارکش ءَ گوشتگ کہ میڑ ءَپد پاکستانی لشکر ءِ جنگی گراب ارش جاہ ءَ اتکگ ءُ وتی مرتگین ءُ ٹپی بیتگیں زرتگ اَنت ءُ دیم پہ شال ءَ شتگ اَنت۔
آئی ءَ گوشتگ کہ بی ایل ایپ راجی لشکرے ایشی سوبمندی گوں بلوچ مھلوک ءَ بندوک اِنت ءُ چہ لس مردمانی پلہ مرزی ءِسوب ءَبی ایل ایپ بلوچستان ءِ شھر ءُ کوچگاں مھکم اِنت۔
جارکش ءَ گوشتگ کہ بی ایل ایپ ءَ وت ءَ گوں نوکیں جنگی رپک ءُ گل ءِ نوکیں لوٹاں بندوک کُرتگ،پمشکا سرجمیں بلوچستان ءَ پاکستانی لشکر ءِ سر ءَ اُرش برجاہ اَنت۔پاکستانی لشکر زھنی نادراہ جوڑ بیتگ، زوت کہ دیر بلے پاکستانی لشکر چہ بلوچ سرڈگار ءَ دراھگ ءَ لاچار بیت۔
میجر گھرام ءَ گوشتگ کہ بی ایل ایپ داں بلوچستان ءِ آجوئی ءَ پاکستانی لشکر ءَ نشانگ کنت۔
