بلوچ نیشنل مومنٹ ءِ پیشگیں سرکماش ءُ بلوچ سروک ھلیل بلوچ ءَ ماں چاگردی رسانکدر ایکس ءَ شھید بانک کریمہ ءِ شھیدی سالروچ ءِ درگت ءَ وتی درشانے ءَ گوشتگ کہ مرچی ما وتی راج ءِ شیرزال بانک کریمہ بلوچ ءِ شھیدی سالروچ ءِ درگت ءَ آئی ءَ گیر کار ایں کہ آئی ءَ وتی زندگی پہ راجی آجوئی ءُ پجار ءَ ندر کُرتگ۔ آ نہ تیوک ءَ بی ایس او ءِ بنداتی جنین بیتگ بلکیں انچیں رھشونے بیتگ کہ آئی گوں وتی توکل، زانت ءُ مھکمی ءَ گوستانک ءِ تہ ءَ وت ءَ زندگ کُرتگ۔
بلوچ رھشون ءَ گوشتگ کہ راجی سیاست ءِ پڑا بانک کریمہ ءِ کرد ءَ بلوچ مدام گیر کار ایت۔ مرچی ما ھرنیمگ ءَ تیوک ءَ جنین ءُ ورنایانی جُھد ءَ گندگ ءَ ایں ایشی تہ ءَ بانک کریمہ ءِ مزنیں کردے۔ آئی ھر کوچگ ءُ دمگ ءَ یکجاھی ءِ کار دیم ءَ برتگ ءُ جُھد ءَ یک توانے داتگ۔
ھلیل بلوچ ءَ گوشتگ کہ کینڈا ءَ درانڈیھی ءِ میان ءَ بانک کریمہ وتی جھد برجاہ داشتگ۔ آئی نہ ترسی ءُ توکل دژمن ءَ اوپار نہ بوت، چار سال پیش آئی چہ مارا یک ھمبل ءُ سروکے ءَ زبھر کرت۔ بلوچ راج مدام آئی کرد ءُ کاراں گیر کار ایت۔
