سراوان: شستون ءَ پنچ شمبے ءِ روچ ءَ لبزانکی ءُ ربیدگی گل آتار ءِ چیردستی ءَ ماں زانشجاہ آزات ءَ بلوچی زبان ءِ وانگ ءُ زانگ ءِ باروا دیوانے برجم دارگ بیتگ۔
دوان ءَ لبزانکی ءُ ربیدگی گل آتار ءِ اُگدھدار ءُ باسکاں ھوار زانشجاہ ءِ استاد ءُ نودربراں بازیں کچ ئِے ءَ بھر زُرتگ۔
چہ لبزانکی ءُ ربیدگی گل آتار ءِ نیمگ ءَ ماجد مساپر ءَ بلوچی زبان ءِ باروا گپ ءُ تران کُرتگ ءُ مردم سرپدی داتگ اَنت کہ جھان ءِ چنچو زبان اَنت ءُ بلوچی جھان ءِ چُنتمی زبان اِنت۔کجام زبان گوں بلوچی زبان ءَ سیادی دار اَنت۔ کجام زبان ءِ گال ءُ گالرد گوں بلوچی ءَ نزیکی کن اَنت۔
دیوان ءِ گُڈسر ءَ ماجد مساپر ءَ دلگوش گوں بلوچ نودربر ءُ استاداں کُرتگ ءُ گْوشتگ کہ زبان پہ وانگ، نبشتہ کنگ ءُ گپ جنگ ءَ زندگ بنت، بلوچ ءَ اگاں وتی زبان زندگ دارگی اِنت گڑا الم وتی زبان ءَ بوان ایت، نبشتہ بہ کنت ءُ گپ بہ جنت۔
آئی ءَ گْوشتگ کہ شستون ءُ کَش ءُ گْوراں چیزے سال اِنت کہ لبزانکی ءُ ربیدگی گل آتار بلوچی کلاس برجم دارگ ءُ مردماں بلوچی وانینگ ءَ اِنت۔ ھمے زوتاں چہ آتار ءِ نیمگ ءَ ماں زانشجاہ آزات ءَ بلوچی کلاس برجم دارگ بنت، بایدیں گیشاں چہ گیش نودربر بھر بہ زور اَنت ءُ وتی زبان ءَ دربہ بر اَنت۔
لبزانکی ءُ ربید گل آتار ءِ نیمگ ءَ ھمے زوتاں زانشجاہ آزات شستون ءَ بلوچی کلاس برجم دارگ بیگ ءَ اَنت۔
آتار ءَ وتی شنگ کُرتگیں جارے ءَ چہ زانشجاہ آزات ءِ دُرسیں نودربراں دزبندی کُرتگ کہ گیشاں چہ گیش کلاساں بھر بہ زور اِت ءُ وتی زبان ءِ وانگ ءُ نبشتہ کنگ ءَ در بہ بر اِت۔
