بلوچ نیشنل موومنٹ ( بی این ایم ) ءِ انسانی ھکّانی ادارہ پانک ءَ نومبر 2024 ءِ میان ءَ ماں بلوچستان ءَ انسانی ھکّانی ناگیگیں جاور ءِ سر ءَ گزارش شنگ کرتگ۔ گزارش ءِ تہ ءَ کراچی ءُ بلوچستان ءِ 15 دمگاں 98 کسانی زور بیگواھی ءُ 12 ءِ درآمیدگسی کوشانی بارہ ءَ گْوشگ بیتگ۔ تیوک ءَ کیچ ءَ 31 کسانی زور بیگواھی پیتبند کنگ بیتگ کہ چہ دگہ دمگاں گیشتر اِنت۔
گزارش ءِ رد ءَ ، پاکستانی لشکر ءُ آئی ءِ ھمدست بدنامیں ’’ آپریشن سائیلنس ‘‘ ءِ رد ءَ ’’ بہ کش ءُ چکل دئے ‘‘ ءِ شوندات ءِ سر ءَ مردماں زور بیگواہ کنگ ءُ درآمیدگسی کشگ ءَ اَنت ءُ بگیریانی دارگ ءَ آیانی کنٹاں دیر ءُ دریں جاھاں چگل دیگ ءَ اَنت۔ پدر بیتگیں 12 در آمیدگسی کوشانی تہ ءَ مھمد نواز ، گلام بزدار ءُ جاپر مری کشگ بیتگ اَنت کہ 6 نومبر ءَ چہ موساھیل ءَ آوار جنگ بیتگ اَت اَنت۔ بشیر اھمد کہ مئی ءَ چہ گوادر ءَ زور بیگواہ کنگ بیتگ اَت ، 23 نومبر ءَ آئی ءِ کنٹ دست کپت۔16 سالی ئیں اسرار ءِ درآمیدگسی کوش سکا دلپدرد کنت ، آ ناشرکاری ءِ گر ءُ داری تک ءَ دزگیر کنگ ءَ پد کشتگ۔
گزارش ءَ سھرا کنگ بیتگ کہ اے لشکری شوندات ءِ تہ ءَ تیوک ءَ سرمچار نشانگ کنگ بیگ ءَ نہ اَنت بلکیں دگہ شھرمنند ھم نشانگ کنگ بیگ ءَ اَنت۔ سرجمیں آبادی یا کھول ڈنڈ دیگ بیت داں مردم ترس ءِ آماچ بہ بہ اَنت۔ لشکر ءِ ھمدستیں مردم کشیں رمب کہ آیانی تہ ءَ ڈنگ، دز ءُ نشہ بھا کنوک گون اَنت ، جاور ءَ چد ءُ گیش ھراب کنگ ءَ اَنت۔ لشکر ءِ اے چیرک ناں ایوک ءَ مردمانی لٹ ءُ آزار دیگ ءَ گون اَنت بلکیں دزی ءُ نشہ ءِ سوداگری ھم کن اَنت ، ءُ پہ اے کاراں آیاں ھچ وڑیں گر ءُ بند نیست۔
بلوچستان ءِ مردم جانی تاوان ءُ نادلجمیں جاورانی پد ءَ تباھی ءِ آماچ اَنت۔ پانک ءِ رد ءَ زانگ بیت کہ زور بیگواھی ءُ کوشانی کچ چد ءُ گیشتر اِنت ، بلے چہ ترس ءَ باز مردم ھال نہ کن اَنت۔
بلوچ نیشنل موومنٹ ءَ چہ میان استمان ءَ زیتیں دلگوش ءِ لوٹ کرتگ داں اے زوراکی دارگ بہ بہ اَنت ءُ ایشانی زمہ وار آمیدگس ءَ پیش کنگ بہ بہ اَنت۔ انسانی ھکّانی پانکجناں کڈن کرتگ کہ اے زوراکیانی آسر کنگ ءُ سانمندیں کھولانی انساپ ءَ میان استمانی دزمانجنی ھژدری اِنت۔
