بلوچستان لبریشن فرنٹ ءِ جارکش میجر گھرام ءَ ماں رسانکدر ءَ وتی شنگ کُرتگیں درشانے ءَ گْوشتگ کہ 11 دسمبر ءَ سُھب ءِ دہ ءَ کیچ، ھوت آباد ءَ سرمچاراں مادن بروکیں دو ٹرالرانی سر ءَ اُرش کُرتگ ءُ تاوان داتگ اَنت، ءُ پہ پاکستانی لشکر ءَ آپ برگ ءَ بیتگیں آپ ءِ ٹینکر مانداشتگ۔
آئی ءَ گْوشتگ کہ ھمے روچ ءَ سرمچاراں میر آباد ءَ مادن بروکیں دو ٹرالرانی ٹائیر جتگ اَنت۔
آئی ءَ گْوشتگ کہ 12 دسمبر ءَ سُھب ءِ یازدہ ءَ سرمچاراں کیچ، ھوت آباد ءَ یک ٹرالرے کہ پنجاپ ءَ روگ ءَ بیتگ ءُ پاکستانی لشکر ءِ شوربندی کنسٹرکشن کمپنی ءِ دو ڈمپر مانداشتگ۔
جارکش ءَ گْوشتگ کہ 15 دسمبر ءِ شپ ءَ سرمچاراں انٹلیجنس ءِ ھال دیگ ءِ بنیاد ءَ پروم ءَ دژمنیں لشکر ءِ یک ٹرکے کہ چہ راشن ءَ بار بیتگ گوں راشناں مانداشتگ۔ ڈرائیور سرپد کُرتگ ءُ یل داتگ۔
آئی ءَ گْوشتگ کہ زورگریں پاکستان زورگِپتیں بلوچستان ءَ وتی جوڑ کُرتگیں لُٹ ءُ پُلی دگاں بگر داں مادناں ھرچیز ءَ پہ وتی لشکری ءُ مالی نپ ءُ سیتاں کارمرز کنگ ءَ اِنت۔ پورٹ منرو، ڈی جی ھان ءَ بگر داں بلوچ تیاب ءَ بلوچستان ءِ مادن، اشکر، تلاہ ءُ دگہ بلوچ مڈیاں پہ دیم لُٹگ ءُ پنجاپ ءَ آباد کنگ ءَ اِنت۔ چہ مئے مڈیاں زورگریں پاکستانی لشکر وت ءَ مھکم کنگمئے مردمانی سر ءَ زوراکی ءُ ورنایاں زور بیگواہ کنگ ءُ بے دردی مئے چکچینی ءَ کنگ ءَ اِنت۔ چہ بدبھتی ءَ مئے لھتیں ٹیکیدار، ٹرانسپورٹر ءُ مزنیں مردم پہ کمو نپ ءُ سیتاں اے بلوچ دژمنی کار ءَ دژمن ءَ کمک کنگ ءَ اِنت کہ ما ایشی ءَ ھچ پیم ءَ نہ منّ ایں۔ آدگہ مادنانی وڑ ءَ سیمسر ءَ کار کنوکیں ٹینکر ءُ زامیاد گاڑیانی واھند پہ ٹوکنے ءَ وڑ وڑ ءَ بلوچ جُھد ءِ بگیری ءَ کارمرد بیگ ءَ اِنت، ءُ زورگریں پاکستانی لشکر چہ آیاں باجگری گرگ ءَ ابید بلوچ آجوئی ءِ بگیری ءَ کار گِرگ ءَ اِنت۔
میجر گھرام ءَ گْوشتگ کہ ما ٹرانسپورٹراں ھوار باز رند ءَ وتی مردم کڈن کُرتگ اَنت کہ دژمن ءِ کمکار جوڑ مہ بہ اِت بلے لب ءُ ملاماں آیان ءَ چہ راجی جربگ ءُ لیکہ زبھر کُرتگ۔ یک نیمگے بلوچ سرمچار پہ سرڈگار ءِ آجوئی ءُ پہ وتی پدریچانی وژھالی ءَ وتی سراں ندر کنگ ءَ اَنت ءُ دومی نیمگ ءَ کاروباری مردم پہ زانت ءُ نازانتی راجی جُھد ءِ بگیری ءَ کارمرز بیگ ءَ اَنت۔
آئی ءَ گْوشتگ کہ ما یکبرے پد ءَ چہ راج ءَ دزبندی کن ایں کہ آ دژمن ءِ اے پندل ءَ سرپد بہ بیت ءُ دیمتر ءَ دژمن ءِ لُٹ ءُ پُل کنگ ءِ کارانی بھر جوڑ مہ بیت، اگاں نہ گڑا ایشی ءِ آسر شر نہ بیت۔
بی ایل ایپ ءِ جارکش ءَ چاریں اُرشانی زمہ واری منّ اِتگ ءُ گْوشتگ کہ داں بلوچستان ءِ آجوئی ءَ زورگریں پاکستانی لشکر ءُ ھما کہ اے میارباریاں شریدار اَنت آیانی سر ءَ اُرُش برجاہ بنت۔
