بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ ماں چاگردی رسانکدر ایکس ءَ سلمان ءِ زوریں بیگواھی ءِ پژدر ءَ نبشتگ کہ چہ شال ءَ 13 نومبر 2022 ءَ زور بیگواہ کنگ بوتگیں سلمان ء جان مھمد کہ آ ھزدار ءِ جھمنند اِنت آجو کنگ بہ بیت۔
آئی ءَ گوشتگ کہ پاکستان ءِ مزن وزیر ھمک رسانکدر ءَ گوش ایت بلوچستان ءَ زور بیگواھیں مردمانی کچ پنجاہ ءَ گیش نہ بیت، اے وھد ءَ مئے زھرشانی نندانک ءَ تیوک ءَ پنجاہ ءَ گیش انچیں مردم اَنت کہ چہ آیانی گس ءَ یک نہ یک مردمے زور بیگواہ کنگ بوتگ۔
سمی دین ءَ گوشتگ کہ چہ اسلام آباد پریس کلب ءَ داں مزن وزیر ءِ گس ءَ اے مات ءُ گھارانی نالگ ءُ نادراھی ءِ دیمپان اَنت کہ آیانی جکگ ءِ توار سر بیت بلکیں مزن وزیر ءِ گس ءِ دیوال ” ساونڈ پروپ“ اَنت، پمیشکا آیانی آہ اسلام آباد پریس کلب ءِ دیم ءَ گٹگیر بنت۔
