بلوچ یکجھتی کمیٹی ءَ وتی شنگ کرتگیں درشانے ءَ گوشتگ، ده دسمبر ءَ انسانی ھکانی جھانی روچ ءِ درگت ءَ کراچی، شال ءُ کیچ ءَ زهرشانی کنگ بیت۔
بی وائی سی ءَ گوشتگ کہ بلوچ چه گوستگیں بازیں دھکاں زوراکیانی آماچ اِنت. بلوچانی زوربیگواھی ، ناھُودگیں کوش ، بلوچستان ءَ لشکرکشی کنگ ءُ آیانی آزار دیگ ءَ ھوار بازیں درور ھست اَنت که آ په بلوچانی چکچینی ءَ کارمرز کنگ بیگ ءَ اَنت۔
آئی ءَ گوشتگ کہ نومبر ءِ ماه ءَ ھشتاد ءُ یک مردم بیگواه کنگ بوتگ ءُ ھشت مردم ءِ لاش دزکپتگ۔ چه ایشاں اَبید بازیں کیس ھست اَنت که چہ بلوچستان ءِ جاورانی سوب ءَ پدر دیم ءَ آرگ ءَ اِش نہ اَنت۔
بی وائی سی ءَ گوشتگ کہ ھمے درگت ءَ ده دسمبر ءَ انسانی ھکانی جھانی روچ ءِ درگت ءَ چه بی وائی سی ءِ نیمگ ءَ کراچی، شال ءُ کیچ ءَ زهرشانی کنگ بیت. گوں بلوچ راج ءَ دزبندی کن ایں که زھرشانیاں بھر بزور اِیت۔
