شال: بولان میڈیکل وانشجاہ (بی ایم سی) ءِ نودربراں مرچی پنچ روچ اِنت کہ زھرشانی ءَ نشتگ اَنت۔ نودربراں وانشجاہ ءِ وابجاہ (ہاسٹلز) ءِ بند کنگ ءِ بگیری ءَ زھرشانی کنگ ءَ اَنت۔
آیاں گْوشتگ کہ بی ایم سی ءِ اتزامیہ ءُ کانود برجاہ داروں ادارہ گوں پاکستانی لشکر ءَ ھور اَنت ءُ وابجاہ اِش گپتگ۔ چہ ایشی ءِ مئے وانگ زوال بیگ ءَ اِنت ءُ مئے بنکی ھک وانگ چہ ما پُلگ بیگ ءَ اِنت۔
نودربراں گْوشتگ کہ لشکر ءِ انیگیں زوراکی ءُ دزگیریانی میان ءَ مئے باز نودربر ٹپی ءُ باز تُستگ۔ چہ ایشی ءَ ما ھمے سرپد بیں کہ لشکر بلوچ نودربران ءَ چہ وانگ ءُ زانگ ءَ زبھر کنگ لوٹ ایت۔
آیاں گْوشتگ کہ اگاں مئے لوٹ منّگ مہ بنت گڑا ما گیش زھرشانی کن ایں ءُ ھچ وڑ ءَ بےتوار نہ بیں۔
نودربراں وانگجانی پہ لشکر ءِ سیتاں کارمرز کنگ گوں تُرندی ءَ ایرجتگ ءُ گْوشتگ کہ ما وتی وانگجاھاں ھچ وڑ ءَ نیل ایں کہ لشکر ءِ بنجل جوڑ بہ بنت۔واکدار بلوچ ءُ پشتون نودربراں بھر ءُ بانگ کنگ ءَ اَنت کہ ما ایشی ءَ ھچ وڑ ءَ نہ منّ ایں۔
آیاں گْوشتگ کہ زھرشانی داں ھما وھد ءَ برجاہ بیت داں وانشجاہ ءُ وابجاہ پد ءَ پچ کنگ ءُ دزگیر کُرتگیں نودربر یل دیگ مہ بنت۔
